ប្រធានាធិបតីកូរ៉េខាងត្បូង Yoon Suk-yeol បាននិយាយកាលពីថ្ងៃព្រហស្បតិ៍ថា រដ្ឋាភិបាលនឹងបន្ធូរបន្ថយច្បាប់នៃទីផ្សារអចលនទ្រព្យឲ្យកាន់តែលឿនតាមដែលអាចធ្វើទៅបាន ដើម្បីស្ដារស្ថិរភាពទីផ្សារឡើងវិញ បើទោះជាអត្រាការប្រាក់កំពុងឡើងខ្ពស់។
យោងតាមការចុះផ្សាយពី CNA បានឲ្យដឹងថា ទីផ្សារអលចនទ្រព្យនៅកូរ៉េខាងត្បូង គឺកំពុងជួបហានិភ័យធ្ងន់ធ្ងរ ជាមួយនឹងការធ្លាក់ចុះនៃតម្លៃផ្ទះខ្លាំងក្នុងរយៈពេល ២ ទសវត្សចុងក្រោយ ស្របពេលបច្ចុប្បន្នអត្រាការប្រាក់ក៏កំពុងឡើងខ្ពស់ថែមទៀត។
“តម្លៃផ្ទះបានធ្លាក់ចុះ ដោយសារតែអត្រាការប្រាក់មានការកើនឡើង ហើយរដ្ឋាភិបាលនឹងបន្ធូរបន្ថយច្បាប់លើទីផ្សារអចលនទ្រព្យឲ្យបានកាន់តែលឿន ដើម្បីស្ដារស្ថិរភាពទីផ្សារឡើងវិញ”។ នេះបើតាមសម្ដីរបស់ប្រធានាធិបតីកូរ៉េខាងត្បូងបាននិយាយ។
សូមជម្រាបដែរថា ស្ថានភាពវិស័យអចលនទ្រព្យនៃប្រទេសធំៗជាច្រើនកំពុងទទួលការគំរាមកំហែង ដោយសារការធ្លាក់ចុះនៃកំណើនសេដ្ឋកិច្ចពិភពលោក តួយ៉ាងដូចជា Evergrande នៅប្រទេសចិនជាដើម កំពុងផុងខ្លួនជ្រៅក្នុងរណ្ដៅបំណុលវ័ណ្ឌកច្រើនជាង ៣០០ ពាន់លានដុល្លារ៕
