កាលពីថ្ងៃទី ២០ ធ្នូកន្លងទៅ រដ្ឋសភាថៃបានអនុម័តលើការបន្ធូរបន្ថយពន្ធ ដើម្បីជំរុញកំណើនការទិញផលិតផលជាសាធារណៈ ក៏ដូចជាទ្រទ្រង់កំណើនសេដ្ឋកិច្ចក្នុងស្រុកដែលកំពុងមានសញ្ញាវិជ្ជមាន។
យោងតាមការចុះផ្សាយពី CNA បានបង្ហាញថា រដ្ឋាភិបាលនឹងយល់ព្រមកាត់បន្ថយពន្ធលើអាជីវករលក់ទំនិញចាប់ពីថ្ងៃទី ០១ មករាឆ្នាំក្រោយទៅ ក្នុងទំហំទឹកប្រាក់ ៤០ ០០០ បាត ឬ ១ ១៥០ ដុល្លារ។
កាលពីឆ្នាំទៅ កំណើនសេដ្ឋកិច្ចថៃមានការកើនឡើង ១,៥% ដែលស្ថិតក្នុងចំណុចយឺតបំផុតនៅក្នុងតំបន់អាស៊ាន ប៉ុន្តែសេដ្ឋកិច្ចថៃចាប់ផ្ដើមមានដង្ហើមល្អឡើងវិញ បន្ទាប់ពីវិស័យទេសចរណ៍មានការកើនឡើង ក្រោយបន្ធូរបន្ថយវិធានការកូវីដ ១៩ នាពេលកន្លង។
សូមជម្រាបដែរថា ធនាគារកណ្ដាលបានអះអាងកាលពីថ្ងៃច័ន្ទថា សេដ្ឋកិច្ចនៅថៃអាចនឹងងើបរឹងដៃរឹងជើងឡើងវិញនាពាក់កណ្ដាលឆ្នាំ ២០២៣ ខណៈកំណើនសេដ្ឋកិច្ចឆ្នាំនេះអាចកើនដល់ ៣,២% និងបន្តឡើងដល់ ៣,៧% នាឆ្នាំ ២០២៣ រហូតដល់ ៣,៩% នាឆ្នាំ ២០២៤ ទៀតផង៕
