កាលពីថ្ងៃព្រហស្បតិ៍កន្លងទៅ តម្លៃប្រេងឆៅអន្តរជាតិមានការថយចុះ ដោយសារតម្រូវការពីប្រទេសចិនមានការកកស្ទះ គួបផ្សំនឹងការផ្ទុះឡើងវិញនៃជំងឺកូវីដ ១៩ ផង បណ្ដាលឲ្យប្រទេសនាំចូលប្រេងធំបំផុតលើលោក ផ្អាកនាំចូលប្រេងបណ្ដោះអាសន្ន។

យោងតាមរបាយការណ៍ចុះផ្សាយដោយ CNA បានបង្ហាញថា តម្លៃប្រេងឆៅពីតំបន់ធំៗដូចជា Brent និងអាមេរិកថយចុះ ២៦ សេន ឬ ០,៣% ពោលតម្លៃប្រេងឆៅ Brent ធ្លាក់មកនៅ ៨៣ ដុល្លារ/បារ៉ែល ខណៈប្រេងឆៅអាមេរិកនៅសល់ ៧៨,៧ ដុល្លារ/បារ៉ែល។

ដោយឡែក បើតាមការវិភាគរបស់លោក Jun Rong Yeap អ្នកយុទ្ធសាស្ត្រទីផ្សារនៅក្រុមហ៊ុន IG បានបង្ហើបថា តម្លៃប្រេងឆៅនាឆ្នាំ ២០២៣ អាចនឹងងើបឡើងវិញ ប៉ុន្តែវាអាស្រ័យលើការបើកច្រកព្រំដែនឡើងវិញរបស់ប្រទេសចិន និងការចូលរួមកំណត់តម្លៃប្រេងផងដែរ។

សូមជម្រាបដែរថា ទីផ្សារប្រេងក៏ទទួលរងឥទ្ធិពល ពីការតំឡើងការប្រាក់របស់សហរដ្ឋអាមេរិក ស្របពេលធនាគារកណ្ដាល ព្យាយាមកំណត់តម្លៃប្រេងនៅក្នុងស្ថានការណ៍ដែលកំពុងតឹងតែងនាពេលបច្ចុប្បន្ន៕