កាលពីពេលថ្មីៗនេះ ក្រុមហ៊ុន Tesla បានបញ្ចេញរបាយការណ៍លក់ប្រចាំត្រីមាសទី ៤ កាលពីឆ្នាំទៅ ដែលមានទាបជាងការរំពឹងទុក។
ស្ថិតិលក់រថយន្ត Tesla កាលពីត្រីមាសទី ៤ ឆ្នាំ ២០២២ ក្រុមហ៊ុនលក់រថយន្តបាន ៤០៥ ២៧៨ គ្រឿង ទាបជាងការរំពឹងទុកពី Wall Streets ដែលព្យាករណ៍ថា ក្រុមហ៊ុនអាចលក់បានចន្លោះពី ៤២០ ០០០ ទៅ ៤២៥ ០០០ គ្រឿង។
ដោយឡែក យោងតាមការចុះផ្សាយពី Forbes ក៏បានបន្ថែមដែរថា នៅក្នុងត្រីមាសទី ៤ នោះ ក្រុមហ៊ុនបានផលិតរថយន្ត ៤៣៩ ៧០១ គ្រឿង ខណៈការផលិតសរុបប្រចាំឆ្នាំមាន ១,៣៧ លានគ្រឿង ប៉ុន្តែលក់ចេញតែ ១,៣១ លានគ្រឿងប៉ុណ្ណោះ។
សូមជម្រាបដែរថា បើទោះជាស្ថិតិលក់របស់ Tesla ហាក់មានភាពប្រសើរឡើងវិញក៏ពិតមែន ប៉ុន្តែបើក្រឡេកទៅមើលគូប្រជែងដទៃដូចជា BYD ដែលកំពុងដណ្ដើមទីផ្សាររថយន្តអគ្គិសនី គឺកំពុងលំបាកលំបិនខ្លាំង ពោល BYD លក់រថយន្តប្រចាំឆ្នាំបានច្រើនជាង Tesla រហូតជិតកន្លះលានគ្រឿងឯណោះ៕
