ប្រទេសថៃ ក្នុងពេលថ្មីៗនេះ បានបង្ហាញក្តីរំពឹងទុកខ្ពស់ថា ការចំណាយរបស់ភ្ញៀវទេសចរអំឡុងពិធីបុណ្យចូលឆ្នាំចិនខាងមុខនេះ អាចនឹងមានការកើនឡើងដល់ ២១,៣ ពាន់លានបាត ឬ ៦៤០ លានដុល្លារ ពោលគឺស្មើនឹង ៤៨% ធៀបនឹងការចំណាយនៅក្នុងឆ្នាំ ២០១៩ ។
យោងតាមអាជ្ញាធររទេសចរណ៍ថៃ (TAT) លោក Yuthasak Supasorn បានបង្ហាញឱ្យដឹងថា ក្នុងឱកាសពិធីបុណ្យចូលឆ្នាំចិន ដែលចាប់ផ្តើមនៅក្នុងសប្តាហ៍នេះ ប្រទេសថៃរំពឹងថា នឹងអាចទាក់ទាញភ្ញៀវបរទេសចំនួន ៥៨៨ ៩០០ នាក់ និងអាចផ្តល់ប្រាក់ចំណូលចំនួន ១៦,៧ ពាន់លានបាត ចាប់ពីថ្ងៃទី ១៩ ដល់ថ្ងៃទី ២៧ ខែមករា ។
ក្រៅពីនោះ ភ្ញៀវបរទេសសរុបប្រមាណ ៣២២ ៥៩៩ នាក់ ដែលនឹងមកលេងកម្សាន្តនៅក្នុងប្រទេសថៃ ពីតំបន់អាស៊ីឦសាន និងអាស៊ីអាគ្នេយ៍ រំពឹងថានឹងអាចនាំមកនូវប្រាក់ចំណូល ១១ ពាន់លានបាតផ្សេងទៀត ។
ទន្ទឹមនឹងនេះ លោក Yuthasak បាននិយាយថា ការស្ទុះងើបឡើងវិញយ៉ាងគំហុកនៃវិស័យទេសចរណ៍ថៃ គឺបានរួមចំណែកយ៉ាងខ្លាំង បន្ទាប់ពីប្រទេសនានា បានធ្វើការបន្ធូរបន្ថយការរឹតបន្តឹងចំពោះការធ្វើដំណើរ ចាប់តាំងពីត្រីមាសចុងក្រោយ កាលពីឆ្នាំមុនមក។
យ៉ាងណាមិញ ទាក់ទងនឹងទីផ្សារទេសចរណ៍ក្នុងស្រុក លោក Yuthasak បានប៉ាន់ប្រមាណថា ប្រាក់ចំណូលអាចឈានដល់ ៨១% បើធៀបនឹងឆ្នាំ ២០១៩ ឬស្មើនឹង ៤,៦ ពាន់លានបាត កើនឡើង ១៣៩% ពីមួយឆ្នាំទៅមួយឆ្នាំ ៕
