នៅក្នុងកិច្ចប្រជុំមួយនាពេលកន្លងទៅ នាយករដ្ឋមន្ត្រីប៉ូឡូញ Mateusz Morawiecki បាននិយាយថា សហភាពអឺរ៉ុបកំពុងពឹងផ្អែកខ្លាំងលើការនាំចូលថាមពលពីរុស្ស៊ី ហើយពួកគេកំពុងឈ្លក់វង្វេងនឹងវា ដូចជាថ្នាំញៀន។ នេះបើតាមការចុះផ្សាយពី RT។
ថ្លែងនៅក្នុងទីក្រុង Warsaw លោក Morawiecki បានបង្ហើបថា បច្ចុប្បន្ន EU កំពុងជាប់អន្ទាក់របស់រុស្ស៊ី ជាមួយនឹងធនធានធម្មជាតិ ហើយខាងរុស្ស៊ីក៏កំពុងព្យាយាមឲ្យអស់ពីលទ្ធភាព ដើម្បីឲ្យខាងអឺរ៉ុប ងើបខ្លួនមិនរួចពីការផ្គត់ផ្គង់ថាមពលរបស់ខ្លួន។
លោកបន្តទៀតថា ជាលទ្ធផល កិច្ចសន្យាឧស្ម័នជាមួយរុស្ស៊ីបានក្លាយជាកិច្ចព្រមព្រៀងដែលអឺរ៉ុបបានលក់ព្រលឹងរបស់ខ្លួន ហើយទ្វីបនេះត្រូវបាន “ល្បួងដោយរុស្ស៊ីយ៉ាងងាយស្រួល” មិនមែនតាមរយៈ “អានុភាពអាគមអីទេ” ប៉ុន្តែដោយសារតែភាពទន់ខ្សោយរបស់វា។
បន្ថែមពីនោះ មេដឹកនាំប៉ូឡូញក៏បានសង្កត់ធ្ងន់ដែរថា បច្ចុប្បន្នលោកខាងលិចកំពុងស្ថិតនៅក្នុងការពិចារណាដ៏សំខាន់ រវាងការចុះចាញ់នៃលោកខាងលិច ឬក៏ងើបប្រឆាំងជាមួយរុស្ស៊ី បន្តដង្ហើមអរិយធម៌របស់ពួកគេវិញ៕
