សង្គ្រាមរវាងរុស្ស៊ី និងអ៊ុយក្រែនបានផ្ទុះកាលពីថ្ងៃទី ២៤ កុម្ភៈ ២០២២ ហើយបើសិនជាគ្មានជំនួយពីលោកខាងលិច និងសហភាពអឺរ៉ុបទេ សង្គ្រាមមួយនេះនឹងមិនអូសបន្លាយរហូតដល់ជិត ១ ឆ្នាំឡើយ។
ក្នុងចំណោមប្រទេសដែលឧបត្ថម្ភអ៊ុយក្រែនច្រើនបំផុតគឺ សហរដ្ឋអាមេរិកដែលបានប្រកាសផ្ដល់ជំនួយសរុបដល់អ៊ុយក្រែនជិត ១០០ ពាន់លានដុល្លារ តាំងពីសង្គ្រាមបានឆាបឆេះកាលពីខែកុម្ភៈ។ នេះបើតាមការចុះផ្សាយពី Alijazeera។
បន្ថែមពីនោះ សេដ្ឋកិច្ចវិទូ Andre Frank នៃវិទ្យាស្ថានស្រាវជ្រាវ Kiel Institure បានបង្ហើបឲ្យដឹងថា អាមេរិកក៏ជាអ្នកផ្គត់ផ្គង់សព្វាវុធធំបំផុតដល់អ៊ុយក្រែន ខណៈចក្រភពអង់គ្លេស និងអាល្លឺម៉ង់ជាប្រទេសឧបត្ថម្ភធំបំផុត បន្ទាប់ពីមហាអំណាចសេដ្ឋកិច្ចពិភពលោក។
ប្រភពដដែលបន្ថែមថា អាមេរិកបានផ្គត់ផ្គង់សព្វាវុធគិតជាទឹកប្រាក់ប្រហែល ២៤,៣៧ពាន់លានដុល្លារ ខណៈអង់គ្លេសឧបត្ថម្ភប្រមាណ ៤,៤ពាន់លានដុល្លារ ស្របពេលអាល្លឺម៉ង់ប្រហែល ២,៥ ពាន់លានដុល្លារ និងសហភាពអឺរ៉ុបទាំងមូលជាង ៩ ពាន់លានដុល្លារ។
បើទោះជាលោកខាងលិចផ្ដល់ជំនួយច្រើនលើសលុបបែបនេះក្ដី ប៉ុន្តែអ៊ុយក្រែនចាំបាច់ស្នើសុំសព្វាវុធទំនើបៗបន្ថែមទៀត ដ្បិតក្រសួងការពារជាតិអង់គ្លេសធ្លាប់បង្ហើបថា រុស្ស៊ីត្រៀមចាយច្រើនជាង ១៤០ ពាន់លានដុល្លារ សម្រាប់ការធ្វើសង្គ្រាមនៅឆ្នាំ ២០២៣ ខណៈកញ្ចប់ការពារជាតិរបស់ពួកគេនឹងមានរហូតដល់ ១៥៥ ពាន់លានដុល្លារឯណោះ៕
