ប្រមុខការទូត និងជាទីប្រឹក្សារដ្ឋចិន លោក Wang Yi នឹងធ្វើដំណើរទស្សនកិច្ចទៅផ្លូវការកាន់ប្រទេសរុស្ស៊ី ដែលជាដំណើរបេសកកម្មការទូតតំបូង រវាងចិន និងរុស្ស៊ី តាំងពីរុស្ស៊ីបើកការឈ្លានពានលើអ៊ុយក្រែន។ នេះបើតាមការចុះផ្សាយពីសារព័ត៌មាន CNN។
ទីប្រឹក្សាគោលនយោបាយការបរទេសជាន់ខ្ពស់របស់លោក ស៊ី ជិនពីង នឹងត្រូវបំពេញទស្សនកិច្ចក្រៅប្រទេស ៨ ថ្ងៃនាខែនេះ រាប់បញ្ចូលទាំងដំណើរទៅរុស្ស៊ី បារាំង អ៊ីតាលី ហុងគ្រី និងចូលរួមការនិយាយនៅឯសន្និសិទសន្តិសុខទីក្រុង Munich នៅចុងសប្តាហ៍ខាងមុខនេះផងដែរ។
គួររំលឹកដែរថា វេទិកាសន្និសិទសន្តិសុខនៅទីក្រុង Munich អាចក្លាយជាតុចរចារវាងរដ្ឋមន្ត្រីជាន់ខ្ពស់ចិន និងរដ្ឋមន្ត្រីការបរទេសអាមេរិក Antony Blinken ពីបញ្ហាអាមេរិកចោទចិនថា បានបង្ហោះបាឡុងចារកម្មចូលដែនអាកាសរបស់ខ្លួន។
ដោយឡែក សម្រាប់ដំណើរទស្សនកិច្ចរបស់លោក Wang Yi ទៅកាន់ប្រទេសរុស្ស៊ី នឹងរឹតបន្តឹង ក៏ដូចជាផ្ដល់ឱកាសសម្រាប់ប្រទេសទាំង ២ អភិវឌ្ឍនូវភាពជាដៃគូយុទ្ធសាស្ត្រគ្រប់ជ្រុងជ្រោយ និងផ្លាស់ប្ដូរមតិទៅលើបញ្ហាសកលដែលកំពុងកើតមានឡើងសព្វថ្ងៃថែមទៀត៕
