កាលពីពេលថ្មីៗនេះ ប្រធានាធិបតីរុស្ស៊ី វ៉្លាឌីមៀរ ពូទីន បានប្រកាសក្ដែងៗថា រុស្ស៊ីនឹងផ្អាកកិច្ចព្រមព្រៀងនុយក្លេអ៊ែរចុងក្រោយ ជាមួយសហរដ្ឋអាមេរិក បន្ទាប់ពីប្រធានាធិបតីអាមេរិក ចូ បៃឌិន ប្ដេជ្ញាចិត្តថា នឹងបន្តគាំទ្រអ៊ុយក្រែន ដល់ទីបញ្ចប់។
យោងតាមការចុះផ្សាយពី Reuters បានបង្ហាញថា ការផ្អាកកិច្ចព្រមព្រៀងនុយក្លេអ៊ែរនេះ ប្រៀបដូចជាការព្រមានដែល ពូទីន បានផ្ដល់ឲ្យលោកខាងលិច ដែលជ្រៀតជ្រែងក្នុងវិវាទរវាងរុស្ស៊ី និងអ៊ុយក្រែន។
គួររំលឹកដែរថា កិច្ចព្រមព្រៀងនុយក្លេអ៊ែរចុងក្រោយរវាងរុស្ស៊ី និងអាមេរិកមានឈ្មោះថា New START ដែលនឹងបញ្ចប់នៅឆ្នាំ ២០២៦ ខណៈកិច្ចព្រមព្រៀងនេះទៀតសោតគឺ តម្រូវឲ្យភាគីទាំងសងខាង ចុះត្រួតពិនិត្យលើអាវុធនុយក្លេអ៊ែរទៅវិញទៅមក ប៉ុន្តែតាំងពីផ្ទុះសង្គ្រាមនៅអ៊ុយក្រែន ការចុះអង្កេតអាវុធនុយក្លេអ៊ែររវាងប្រទេសទាំង ២ ក៏ត្រូវបានផ្អាកផងដែរ។
គួររំលឹកដែរថា អំឡុងពេលមេដឹកនាំរុស្ស៊ីចេញសេចក្ដីប្រកាសនេះ ប្រធានាធិបតីអាមេរិកក៏កំពុងស្ថិតនៅប្រទេសប៉ូឡូញ និងបានទម្លាយថា អាមេរិក និងសម្ព័ន្ធមិត្តលោកខាងលិច នឹងនៅតែតស៊ូ ប្ដេជ្ញាជ្រោមជ្រែងអ៊ុយក្រែនរហូតដល់ទីបញ្ចប់៕
