បើកទំព័រខែថ្មីភ្លាម ប្រជាជនស្រីលង្កានាំគ្នាធ្វើកូដកម្មប្រឆាំងនឹងរដ្ឋាភិបាល ជុំវិញផែនការសង្គ្រោះសេដ្ឋកិច្ចប្រទេសដែលកំពុងក្ស័យធន រហូតដល់ថ្នាក់បិទមន្ទីរពេទ្យ ធនាគារ និងកំពង់ផែជាបន្ទាន់។
យោងតាមការចុះផ្សាយពី CNA បានបង្ហាញថា ប្រធានាធិបតី Ranil Wickremesinghe កំពុងប្រឈមនឹងការរិះគន់ជាសាធារណៈធ្ងន់ធ្ងរ ចំពោះការតំឡើងពន្ធ និងកាត់បន្ថយការចំណាយនានា ដើម្បីធានាបាននូវកញ្ចប់ជំនួយពី IMF។
ការកាត់បន្ថយការចំណាយរបស់រដ្ឋ និងតំឡើងពន្ធដ៏សំបើម ធ្វើឲ្យប៉ះពាល់ដល់ចំណូលនៃប្រជាជនស្រីលង្កា ជាពិសេសគឺបុគ្គលិកធនាគារ មន្ទីរពេទ្យ និងបុគ្គលិកនានា រហូតបង្កឲ្យកើតមានជាកូដកម្មដ៏ធំ។
ជាការឆ្លើយតបនឹងកូដកម្មដែលកំពុងកើតមាន ប្រធានាធិបតីស្រីលង្កាបានប្រើអំណាចផ្ដាច់មុខរបស់ខ្លួន បញ្ជាឲ្យមានការបង្ក្រាបក្រុមកូដកម្ម និងព្រមានឲ្យពួកគេត្រឡប់ទៅធ្វើការធម្មតាវិញ ជាពិសេសគឺបុគ្គលិករដ្ឋ បើសិនជាមិនចង់បាត់បង់ការងាររបស់ពួកគេ។
សូមជម្រាបដែរថា ស្រីលង្កាចាំបាច់ត្រូវការជំនួយពី IMF ដើម្បីដោះស្រាយបញ្ហាបំណុលអន្តរជាតិប្រមាណ ៤៦ ពាន់លានដុល្លារ ប៉ុន្តែត្រូវរង់ចាំការធានាពីម្ចាស់បំណុលធំគឺប្រទេសចិនជាមុនសិន ខណៈប្រទេសដីកោះមួយនេះអះអាងថា នឹងអាចខ្ចីលុយពីប្រទេសនៅអាស៊ាន បើទោះជាមានហានិភ័យខ្ពស់ក៏ដោយ៕
