មួយរយៈកាលចុងក្រោយនេះ ចិន និងសហរដ្ឋអាមេរិកកំពុងពាក់មុខយក្សដាក់គ្នា បន្ទាប់ពីមានការចោទប្រកាន់រៀងៗខ្លួន ពោលអាមេរិកចោទចិនបង្ហោះបាឡុងចារកម្មចូលដែនអាកាសរបស់ខ្លួន ខណៈចិនចោទអាមេរិកថា ព្យាយាមរារាំងកំណើនសេដ្ឋកិច្ចរបស់ពួកគេដូចគ្នា។
ក្នុងនោះ បញ្ហាដែលធំជាងគេគឺ អាមេរិកព្យាយាមទប់ស្កាត់ចិនមិនឲ្យផ្គត់ផ្គង់ជំនួយដល់សម្ព័ន្ធមិត្តរុស្ស៊ី សម្រាប់សង្គ្រាមនៅអ៊ុយក្រែន ប៉ុន្តែចិនមិនដែលអើពើ និងបន្តធ្វើពាណិជ្ជកម្មជាមួយរុស្ស៊ីខ្លាំងជាងមុនទៀត។
យោងតាមការចុះផ្សាយពី Yahoo បានបន្ថែមថា ភ្នាក់ងារចារកម្មអាមេរិកបានទម្លាយថា ចិនកំពុងព្យាយាមពង្រឹងចំណងមិត្តភាពជាមួយរុស្ស៊ី ដើម្បីប្រកួតប្រជែងជាមួយអាមេរិក បើទោះជាមហាអំណាចសេដ្ឋកិច្ចធំបំផុតលើលោក ព្រមានចិនកុំឲ្យពាក់ព័ន្ធនឹងរុស្ស៊ីក៏ដោយ។
“បើទោះជានឹងទទួលការរិះគន់ពីពិភពលោក ជុំវិញការលូកដៃលើការឈ្លានពានរបស់រុស្ស៊ីលើអ៊ុយក្រែនបែបណា ក៏ចិននឹងនៅតែបន្តពង្រឹងចំណងមិត្តភាព ផ្នែកការពារ សេដ្ឋកិច្ច និងបច្ចេកវិទ្យាជាមួយរុស្ស៊ី ដើម្បីប្រកួតប្រជែងជាមួយសហរដ្ឋអាមេរិកដដែល”។ នេះបើតាមសេចក្ដីរាយការណ៍ទម្លាយដោយចារកម្មអាមេរិក។
គួររំលឹកដែរថា សហរដ្ឋអាមេរិក និងសម្ព័ន្ធមិត្តរបស់ខ្លួនតែងតែនិយាយដដែលៗថា ចិនកំពុងពិចារណាផ្គត់ផ្គង់អាវុធដល់រុស្ស៊ី ដែលមានដូចជា ដ្រូន គ្រាប់កាំភ្លើង និងកាំភ្លើងធំជាដើម។
ដើម្បីទប់ស្កាត់បញ្ហាខាងលើ ក្រុមសម្ព័ន្ធមិត្តលោកខាងលិចបានត្រៀមកញ្ចប់ទណ្ឌកម្មសេដ្ឋកិច្ចលើចិនជាស្រេច ពោលបើសិនជាចិនហ៊ានផ្គត់ផ្គង់អាវុធដល់រុស្ស៊ី លោកខាងលិចនឹងដាក់ទណ្ឌកម្មសេដ្ឋកិច្ចលើចិនភ្លាមៗតែម្ដង។ នេះបើតាមសេចក្ដីរាយការណ៍ពី Reuters៕
