ក្រុមហ៊ុនអភិវឌ្ឍន៍អចលនទ្រព្យជាប់បំណុលច្រើនបំផុតលើលោក Evergrande បានបរាជ័យក្នុងកិច្ចព្រមព្រៀងជាមួយម្ចាស់បំណុលអន្តរជាតិ បន្ទាប់ពីមេធំក្រុមហ៊ុន Hui Ka Yan អះអាងថា នឹងសងប្រាក់ប្រមាណ ៣០០ ពាន់លានដុល្លារ។
យោងតាមការចុះផ្សាយពី Forbes បានឲ្យដឹងថា Evergrande បានជួបចរចាជាមួយម្ចាស់បំណុលកាលពីចុងខែមករា ប៉ុន្តែភាគីទាំងសងខាងនៅមិនទាន់អាចសម្រេចកិច្ចព្រមព្រៀងនៃរចនាសម្ព័ន្ធសងបំណុលបាននៅឡើយ។
កន្លងមក Evergrande ធ្លាប់មានក្ដីសង្ឃឹមថា នឹងទទួលបានការគាំទ្រពីម្ចាស់បំណុលជុំវិញការរៀបចំរចនាសម្ព័ន្ធបំណុលរបស់ខ្លួន ប៉ុន្តែក្រុមម្ចាស់បំណុលបរទេសដែល Evergrande ជំពាក់លុយប្រហែល ២០ពាន់លានដុល្លារ ចង់ទទួលបានប្រាក់របស់ពួកគេវិញលឿនបំផុត បន្ទាប់ពីវិស័យអចលនទ្រព្យនៅចិនរាងងើបឡើងបន្តិច។
ទាក់ទងនឹងបញ្ហាខាងលើ Evergrande ទំនងមិនអាចសម្រេចតាមឡើយ ដ្បិតក្រុមហ៊ុនចង់សងបំណុលជាចំណែកភាគហ៊ុនបន្តិចម្ដងៗ រហូតដល់រយៈពេល ១២ឆ្នាំឯណោះ។
មូលហេតុដែល Evergrande ចង់សងបំណុលជាចំណែកភាគហ៊ុន ដោយសារក្រុមហ៊ុនចង់ទុកលុយដើម្បីបញ្ចប់គម្រោងដែលមិនទាន់សាងសង់រួច និងទុកលុយខ្លះដើម្បីដោះទាល់បញ្ហាចាំបាច់នានា។
ដំណោះស្រាយចុងក្រោយរវាង Evergrande និងម្ចាស់បំណុលបរទេស ទំនងនឹងត្រូវអូសបន្លាយយូរទៀត ហើយស្ថាបនិកក្រុមហ៊ុនអាចនឹងត្រូវដកលុយពីហោប៉ៅផ្ទាល់ខ្លួន បង់រំលោះម្ចាស់បំណុលខ្លះ។
សូមជម្រាបដែរថា បន្ទាប់ពីប្រើប្រាស់ទឹកប្រាក់ផ្ទាល់ខ្លួនប្រមាណ ១ពាន់លានដុល្លារ សងបំណុលខ្លះ បច្ចុប្បន្នទ្រព្យសម្បត្តិរបស់ស្ថាបនិក Evergrande នៅសល់ប្រមាណ ៣ ពាន់លានដុល្លារ៕
