ធនាគារអាមេរិកធំៗ ៦ របូតលុយជាង ១៦០ពាន់លានដុល្លារនៅក្នុងខែនេះ

គិតតែក្នុងខែមីនានេះ ធនាគារអាមេរិកធំៗ​ចំនួន ៦ បានបាត់បង់ទឹកប្រាក់នៅលើទីផ្សារ​ប្រហែល ១៦៥ពាន់លានដុល្លារ ឬប្រមាណ ១៣% បន្ទាប់ពីប្រជាជននាំគ្នាសម្រុកទៅដកលុយ។

យោងតាមការចុះផ្សាយពី FT បានឲ្យដឹងថា ធនាគារអាមេរិកធំៗកំពុង​ជួប​បញ្ហាប្រឈមជាខ្លាំង តួយ៉ាងតម្លៃហ៊ុននៃធនាគារ Citigroup និង Morgan Stanley ជួបប្រទះការធ្លាក់ចុះខ្លាំងបំផុតកាលពី​ថ្ងៃពុធ ខណៈធនាគារ Bank Of America ក៏ធ្លាក់ខ្លាំងបំផុតរយៈពេល ២ឆ្នាំចុងក្រោយ។

ដោយឡែក ក្រុមវិនិយោគិនក៏បានព្យាករណ៍បន្ថែមថា ប្រាក់ចំណូលនៃធនាគារធំៗ ៣ទៀតដូចជា Goldman Sachs, JPMorgan Chase និង Wells Fargo ក៏នឹងអាចមានការខាតបង់ដូចគ្នា។

គួររំលឹកដែរថា កាលពីពេលថ្មីៗនេះ ធនាគារ Silicon Valley Bank ដែលជា​ធនាគារធំបំផុតលំដាប់​ទី ១៦ នៅអាមេរិកបាន​ដួលរលំ ក្រោយអតិថិជនសម្រុកដកប្រាក់ បន្ទាប់ពីមានការ​តំឡើងការប្រាក់​នៅធនាគារកណ្ដាល៕