ជំនួបរវាងប្រធានាធិបតីចិន និងរុស្ស៊ី ក្រោយខកខានជួបគ្នារយៈពេលជិត៤ឆ្នាំ បានចាប់ផ្ដើមតាំងពីថ្ងៃច័ន្ទ ពោលបន្ទាប់ពីលោក ស៊ី ជិនពីង ជាន់ទឹកដីរុស្ស៊ីតែប៉ុន្មានម៉ោង ក៏ប្រញាប់ទៅជួបមិត្តសម្លាញ់ វ៉្លាឌីមៀរ ពូទីន ភ្លាមៗ។
ក្នុងការជួបគ្នាមិនផ្លូវការពីម្សិលមិញ ប្រធានាធិបតីចិនបានប្រាប់ទៅកាន់លោក ពូទីនថា លោកមានជំនឿចិត្តជាមួយប្រជាជនរុស្ស៊ី នឹងបន្តគាំទ្រលោក ពូទីន ជាមេដឹកនាំវិមានក្រឹមឡាំងបន្ត សម្រាប់ការបោះឆ្នោតឆ្នាំ ២០២៤។ នេះបើតាមការចុះផ្សាយពី Reuters។
“ខ្ញុំដឹងថា ឆ្នាំក្រោយនឹងមានការបោះឆ្នោតជ្រើសរើសប្រធានាធិបតីនៅក្នុងប្រទេសអ្នក។ សូមអរគុណចំពោះការដឹកនាំដ៏រឹងមាំរបស់អ្នក ប្រទេសរុស្ស៊ីបានធ្វើឱ្យមានការរីកចម្រើនគួរឱ្យកត់សម្គាល់ក្នុងការសម្រេចបាននូវភាពរុងរឿងរបស់ប្រទេសក្នុងរយៈពេលប៉ុន្មានឆ្នាំចុងក្រោយនេះ។ ខ្ញុំប្រាកដថាប្រជាជនរុស្ស៊ីនឹងគាំទ្រអ្នកយ៉ាងខ្លាំងនៅក្នុងការខិតខំដ៏ល្អរបស់អ្នក”។ នេះបើតាមសម្ដីលោក ស៊ី ប្រាប់ទៅកាន់ ពូទីន។
សូមជម្រាបដែរថា ពូទីន បានកាន់អំណាចកំពូលនៃមហាអំណាចរុស្ស៊ីតាំងពីឆ្នាំ ១៩៩៩ បន្ទាប់ពីលោក Boris Yeltsin លាលែងតំណែង ហើយមកទល់ពេលនេះថ្នាក់ដឹកនាំម្នាក់នេះ នៅមិនទាន់ប្រកាសថា នឹងបន្តឈរឈ្មោះជាបេក្ខភាពប្រធានាធិបតីសម្រាប់ការបោះឆ្នោតឆ្នាំ ២០២៤ នៅឡើយទេ៕
