កាលព្រឹកថ្ងៃសៅរ៍ ទី០៨ ខែមេសា ឆ្នាំ២០២៣ អ្នកឧកញ៉ា សុខ គង់ ប្រធានក្រុមហ៊ុន សូគីម៉ិច អ៊ិនវេសមេន គ្រុប និងអ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានអញ្ជើញចូលរួមអមដំណើរលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចុះពិនិត្យវឌ្ឍនភាពនៃការស្ថាបនាផ្លូវមេ តភ្ជាប់ពីផ្លូវជាតិលេខ៤ ត្រង់ចំណុចគីឡូម៉ែត្រលេខ១៥៨+២៩១ ឆ្ពោះទៅលើភ្នំបូកគោ ស្ថិតនៅស្រុកព្រៃនប់ ខេត្តព្រះសីហនុ។
ដំណើរចុះត្រួតពិនិត្យវឌ្ឍនភាពនៃការងារស្ថាបនាផ្លូវមេមួយនេះ ក៏មានការអញ្ជើញចូលរួមពីលោក គួច ចំរើន អភិបាលខេត្តព្រះសីហនុ រដ្ឋលេខាធិការ អនុរដ្ឋលេខាធិការ ក្រសួងរៀបចំដែនដី និងក្រសួងបរិស្ថាន មន្ត្រីជំនាញពាក់ព័ន្ធ បុគ្គលិកក្រុមហ៊ុន និងកម្មករជាច្រើននាក់ផងដែរ។
បើតាមគម្រោងប្លង់ ផ្លូវធ្វើដំណើរឡើងភ្នំបូកគោ ប្រវែង ៦១គីឡូម៉ែត្រ ដែលឆ្លងកាត់ចំការដូងប្រេងរបស់អ្នកឧកញ៉ា ម៉ុង ឫទ្ធី ប្រវែង ១៥គីឡូម៉ែត្រនេះ មានទទឹងផ្លូវសរុបប្រមាណ ២០ម៉ែត្រ ក្នុងនោះមានផ្លូវរថយន្តទៅមក ៧ម៉ែត្រ ផ្លូវម៉ូតូទៅមក ៦ម៉ែត្រ និងចិញ្ចើមផ្លូវប្រវែង ៣,៥ម៉ែត្រទាំងសងខាង។ គិតត្រឹមថ្ងៃទី០១ ខែមេសា ឆ្នាំ២០២៣ ផ្លូវថ្មីនេះ បានបញ្ចប់ការឈូសឆាយ ១០០% ជាផ្លូវការ និងនៅតែបន្តស្ថាបនាទៅតាមគម្រោងបន្តបន្ទាប់ រហូតដល់ការចាក់កៅស៊ូ។
លោកឧបនាយករដ្ឋមន្ត្រី ជា សុផារ៉ា បានលើកឡើងថា៖ “ថ្ងៃនេះយើងបានចាប់ដៃគ្នា ដើម្បីធ្វើឱ្យផ្លូវនេះកើតឡើងដូចបំណងប្រាថ្នា ដូចអ្វីដែលយើងបានលើកឡើងពេលជួបគ្នា កាលខែមករា ឆ្នាំ២០២២”។
សូមជម្រាបថា គម្រោងស្ថាបនាផ្លូវតភ្ជាប់ឧទ្យានជាតិព្រះមុនីវង្សបូកគោ មកផ្លូវជាតិលេខ៤ ត្រង់ចំណុច គីឡូម៉ែត្រលេខ១៥៨+២៩១ នេះ ត្រូវបានរាជរដ្ឋាភិបាលកម្ពុជា សម្រេចកាលពីដើមឆ្នាំ២០២២ ឱ្យក្រសួងរៀបចំដែនដី នគរូបនីយកម្ម និងសំណង់ សហការជាមួយអ្នកជំនួញជើងចាស់ពីររូបគឺ អ្នកឧកញ៉ាបណ្ឌិត សុខ គង់ និងអ្នកឧកញ៉ាបណ្ឌិត ម៉ុង ឬទ្ធី បើកការឈូសឆាយធ្វើផ្លូវថ្មីនេះឡើង ដើម្បីមានភាពងាយស្រួលសម្រាប់ប្រជាពលរដ្ឋក្នុងការធ្វើដំណើរ ចំណេញពេលវេលា ជួយលើកកម្ពស់សេដ្ឋកិច្ច គាំទ្រដល់ការវិនិយោគ និងទាក់ទាញផ្នែកទេសចរណ៍។
ក្រៅពីចុះត្រួតពិនិត្យពីវឌ្ឍនៈភាពនៃការងារស្ថាបនាផ្លូវមេតភ្ជាប់ពីផ្លូវជាតិលេខ៤ត្រង់ចំណុចគីឡូម៉ែត្រលេខ១៥៨+២៩១រួចហើយ លោកឧបនាយករដ្ឋមន្ត្រី ជា សុផារ៉ា, លោក គួច ចំរើន, អ្នកឧកញ៉ា សុខ គង់, អ្នកឧកញ៉ា ម៉ុង ឫទ្ធី និងមន្ត្រីពាក់ព័ន្ធ ក៏បានបន្តដំណើរទៅចុះពិនិត្យគម្រោងការសាងសង់រូបព្រះពុទ្ធប្បដិមា កម្ពស់ ១០៨ម៉ែត្រ នៅលើខ្នងភ្នំបូកគោ ដែលជាព្រះពុទ្ធប្បដិមា ព្រះភ្នែនខ្ពស់ជាងគេនៅលើពិភពលោក ស្ថិតនៅក្នុងឧទ្យានជាតិព្រះមនុវង្ស«បូកគោ»។ ព្រះពុទ្ធប្បដិមាដ៏ធំមហិមាលើភ្នំបូកគោនេះ គ្រោងនឹងចំណាយថវិកាប្រមាណពី ៣០លានដុល្លារ ទៅ ៤០លានដុល្លារអាមេរិក ក្រោមគំនិតផ្ដួចផ្ដើម និងការចំណាយរបស់ អ្នកឧកញ៉ា សុខ គង់ អគ្គនាយកក្រុមហ៊ុន សូគីម៉ិច និងជាម្ចាស់សណ្ឋាគារ ឋានសួគ៌ សុខា បូកគោ។
អ្នកឧកញ៉ា សុខ គង់ ធ្លាប់បានបញ្ជាក់ថា គោលបំណងនៃការសាងសង់រូបសំណាកព្រះពុទ្ធបដិមាដ៏ធំនេះ ដើម្បីជាទីសក្ការៈដ៏ថ្លៃថ្លាឧត្តុងឧត្តម សម្រាប់បងប្អូនប្រជាពលរដ្ឋខ្មែរ និងដើម្បីឧទ្ទិសសុំសេចក្តីសុខ សេចក្តីចម្រើនរុងរឿង និងសុខសន្តិភាពជានិច្ចនិរន្តរ៍ ដល់ប្រជាពលរដ្ឋយើងទាំងអស់នៅក្នុងតំបន់នេះ ក៏ដូចជានៅទូទាំងប្រទេសកម្ពុជា។ ម្យ៉ាងវិញទៀត ព្រះពុទ្ធបដិមាដ៏ធំស្កឹមស្កៃនេះ ក៏នឹងជួយរួមចំណែកទ្រទ្រង់ ដល់វិស័យព្រះពុទ្ធសាសនា និងការអភិវឌ្ឍទេសចរណ៍វប្បធម៌ ជាពិសេសទៀតនោះ នឹងអាចទាក់ទាញភ្ញៀវទេសចរជាតិ និងអន្តរជាតិ រាប់លាននាក់ក្នុងមួយឆ្នាំៗ មកកាន់តំបន់នេះ៕
