លោកឧកញ៉ា សំ សុខនឿន ប្រធានសមាគមអចលនទ្រព្យសកល និងជាប្រធានក្រុមហ៊ុន Sam SN Realty បានចែករំលែករឿងពិតមួយ កាលពី១៥ឆ្នាំមុន ដែលមានឪពុកម្តាយមិត្តភ័ក្តិរបស់លោកម្នាក់ បានទិញដីទុកទំហំសរុប ១០០ហិកតា ក្នុងតម្លៃចន្លោះពី ១,៥ម៉ឺនដុល្លារ ទៅ២ម៉ឺនដុល្លារ រហូតដល់ឆ្នាំ២០២៣នេះ អាចលក់បានតម្លៃដល់ទៅ ៣,៥លានដុល្លារ។
ឧកញ៉ា សំ សុខនឿន បានលើកឡើងលើបណ្តាញសង្គមហ្វេសប៊ុក កាលពីថ្ងៃអាទិត្យម្សិលមិញ យ៉ាងដូច្នេះថា កាលពី១៥ឆ្នាំមុន ឳពុកម្តាយរបស់មិត្តរបស់លោកម្នាក់ បានវិនិយោគដីទំហំ ១០០ហិកតា ហើយដី ដែលគាត់ទិញនោះ មួយចំនួន មានតម្លៃ ១០០ដុល្លារ និងមួយចំនួន មានតម្លៃ ២០០ ដុល្លារ ក្នុងមួយហិកតា និងចុងក្រោយបំផុត ដីមួយចំនួនគាត់ទិញតម្លៃ ៣០០ ដុល្លារ ក្នុង១ហិកតា។
លោកឧកញ៉ា បានបញ្ជាក់ថា នៅពេលនោះ កាលពី១៥ឆ្នាំមុន បងប្អូនយើងមួយចំនួនគិតថា ដីនេះទិញមិនដឹងយកធ្វើអ្វី ហើយថាតម្លៃថ្លៃនៅពេលនោះ។ ដូច្នេះគាត់ចំណាយទុនដើម្បីទិញដីសរុប ១០០ ហិកតានោះមានតម្លៃសរុប ចន្លោះ ពី ១ម៉ឺន៥ពាន់ដុល្លារ ទៅ ២ម៉ឺន៥ពាន់ដុល្លារ។ លោកឧកញ៉ា បន្តថា គាត់បានរង់ចាំអស់រយៈពេល ១៥ឆ្នាំ ហើយគាត់ចំណាយពេល៣ឆ្នាំ ដើម្បីលក់ដីនេះដាច់ ដោយឆ្នាំ២០២៣ នេះ គាត់បានលក់ដីនេះដាច់ ក្នុងតម្លៃ ៣លាន ៥ សែនដុល្លារ។
អតីតកូនកសិករស្រុកក្រូចឆ្មាររូបនេះ បានបន្ថែមថា អ្នកដែរសប្បាយចិត្តជាងគេបំផុត គឺកូនៗរបស់គាត់ ព្រោះថាដីនោះគាត់ទិញទុករយៈ១៥ឆ្នាំ ដើម្បីទុកឱ្យកូនៗ។ នេះជារឿងពិតនៃការវិនិយោគដីធ្លី ក្នុងចំណោមរឿងរាប់លានរឿង ដែលបានកើតឡើងក្នុងប្រទេសកម្ពុជា។ ឧកញ៉ា សំ សុខនឿន បានចោទជាសំនួរថា ត្រឡប់មកនិយាយអំពីបច្ចុប្បន្ន ឬពេលនេះវិញ តើបងប្អូនយើងណាខ្លះបានទិញដីទុក សម្រាប់ការវិនិយោគរយៈពេលវែងដូចគាត់? ឬបានត្រឹមគិត មិនទាន់បានទិញ?
