ពាណិជ្ជករកំពុងរកស៊ីនៅប្រទេសកម្ពុជា ឃើញមានវត្តមានច្រើនគួរឲ្យកត់សម្គាល់នារយៈពេលប៉ុន្មានឆ្នាំចុងក្រោយនេះ ក្នុងនោះក៏មានពាណិជ្ជករជើងចាស់រាប់ទស្សវត្សរ៍មួយចំនួននៅតែបន្តឈរជើងក្នុងពិភពជំនួញ ហើយថែមទាំងមានឥទ្ធិពលទៀតផង។
ចំនួនស្ថិតិគោរមងារ «ឧកញ៉ា អ្នកឧកញ៉ា» នៅប្រទេសកម្ពុជាមិនទាន់មានតួលេខបញ្ជាក់ច្បាស់លាស់នៅឡើយទេ គិតត្រឹមពាក់កណ្តាលឆ្នាំ២០២៣នេះ ពីមន្រ្តីរាជរដ្ឋាភិបាល។ យ៉ាងណា សម្រាប់ម្ចាស់អាណាចក្រសម្ព័ន្ធក្រុមហ៊ុនគ្រាក់ៗ មិនមានច្រើននោះទេ ដែលត្រូវបានគេមើលឃើញថា កំពុងក្តោបក្តាប់សេដ្ឋកិច្ចកម្ពុជា។
សារព័ត៌មានឧកញ៉ាញូស៍ (Oknha news) ធ្វើការណែនាំអ្នកឧកញ៉ាគ្រាក់ៗ ដែលកំពុងក្តោបក្តាប់ជំនួញប្រាក់ពាន់លានដុល្លារក្នុងដៃ ហើយមិនតែប៉ុណ្ណោះ អ្នកឧកញ៉ាទាំំងនោះថែមទាំងមានអំណាចឥទ្ធិពល និងប្រជាប្រិយភាពក្នុងចង្កោមអ្នកឧកញ៉ា ឧកញ៉ា និងអ្នករកស៊ីនៅក្នុងប្រទេសកម្ពុជា នាពេលបច្ចុប្បន្ន។
សម្រាប់វគ្គទី១នេះ ឧកញ៉ាញូស៍ ធ្វើការតាមដានពីប្រជាប្រិយភាពអ្នកឧកញ៉ា លី យ៉ុងផាត់ ជាសហគ្រិនចាស់វស្សាមួយរូបដ៏មានឥទ្ធិពល ខណ:ពេលបច្ចុប្បន្នក្រុមហ៊ុន L.Y.P Group កំពុងក្តោបក្តាប់សេដ្ឋកិច្ចកម្ពុជាស្ទើរទាំងស្រុងតាមរយ:បុត្រសម្ព័ន្ធក្រុមហ៊ុនប្រាក់ពាន់លានជាច្រើនក្នុងដៃ។
មានវ័យ ៦៥ អ្នកឧកញ៉ាជាមន្រ្តីនយោបាយពីខាងគណបក្សប្រជាជនកម្ពុជា ជាសមាជិកព្រឹទ្ធសភា ជាតំណាងរាស្រ្តមណ្ឌលខេត្តខេត្តកោះកុង ដែលជាខេត្តត្រូវបានគេគ្រប់គ្នាផ្តល់រហស្សនាមថា «ស្តេចកោះកុង» ឬ «King of Koh Kong» ក៏ព្រោះលោកបានផ្តើមចាប់មុខជំនួញចាក់គ្រឹះដ៏រឹងចេញពីទឹកដីខេត្តជាប់ព្រំដែនប្រទេសថៃមួយនេះឯង។
ក្រៅពីជាមន្រ្តីនយោបាយ ជាពាណិជ្ជករដ៏មានអំណាច អ្នកឧកញ៉ា លី យ៉ុងផាត់ ក៏ជាកំពុងដឹកនាំសមាគមឧកញ៉ាកម្ពុជាថែមទៀត។ សមាគមនេះត្រូវបានចុះបញ្ជីជាផ្លូវការនាពេលថ្មីៗនេះ ដែលមានវត្តមានសម្តេចតេជោ ហ៊ុន សែន នាយករដ្ឋមន្រ្តី ជាប្រធានកិត្តិយស។
តាមរយ:តួនាទីដ៏ធំមហិមានេះ អ្នកឧកញ៉ា ត្រូវបានគេមើលឃើញថា ជាអ្នកមានឥទ្ធិពល និងប្រជាប្រិយភាពមួយរូបក្នុងចំណោមពាណិជ្ជករចាស់វស្សាកំពុងរកស៊ីជោគជ័យយ៉ាងសម្បើមក្នុងពិភពជំនួញប្រទេសកម្ពុជា។ ការណ៍ដែលចាត់ទុកអ្នកឧកញ៉ា លី យ៉ុងផាត់ មានឥទ្ធិពល គឺដោយសារតែសមាគមឧកញ៉ាកម្ពុជា ប្រមូលផ្តុំដោយអ្នកមានគ្រាក់ៗ ហើយថែមទាំងមានគោរមងារឧកញ៉ា អ្នកឧកញ៉ា ស្របពេលដែលប្រទេសជាតិរីកចម្រើនទៅបានក៏អាស្រ័យដោយមានក្រុមអ្នកជំនួញហ្នឹងឯងចូមរួមរុញច្រានសេដ្ឋកិច្ច។
លើសពីនេះ អ្នកតាមដានស្ថានភាពសង្គមមួយចំនួនបានប្រាប់សារព័ត៌មានឧកញ៉ាញូស៍ថា អ្នកឧកញ៉ា លី យ៉ុងផាត់ កំពុងតែកសាងប្រជាប្រិយភាព និងកសាងសមិទ្ធផលជាច្រើនបន្សល់ទុកជាកេរ្តិ៍ដំណេរសម្រាប់អ្នកជំនាន់ក្រោយរបស់លោក។ ទោះជាបែបក្តីអ្នកឧកញ៉ាក៏ពុងត្រួសត្រាយផ្លូវសម្រាប់កូនៗរបស់លោកផងដែរ។
សូមជម្រាបជូនថា អ្នកឧកញ៉ា លី យ៉ុង ផាត់ បានទទួលងារជាឧកញ៉ានៅថ្ងៃទី២៨ ខែសីហា ឆ្នាំ១៩៩៨ តាមរយៈព្រះរាជក្រឹត្យលេខ ០៨៩៨/៥៨។ អ្នកឧកញ៉ាត្រូវបានរដ្ឋាភិបាលតែងតាំងជាប្រតិភូរាជរដ្ឋាភិបាលទទួលបន្ទុកអភិវឌ្ឍន៍ខេត្តកោះកុង និងជាទីប្រឹក្សាសេដ្ឋកិច្ចពិសេសរបស់សម្ដេចតេជោ ហ៊ុន សែន នាយករដ្ឋមន្ត្រី កាលពីអំឡុងឆ្នាំ២០០០។ ឆ្នាំ២០០១ អ្នកឧកញ៉ាជាប់ឆ្នោតជាអនុប្រធានសភាពាណិជ្ជកម្មកម្ពុជា។ ឆ្នាំ២០០៥ ត្រូវបានតែងតាំងជាទីប្រឹក្សាជាន់ខ្ពស់នៃសមាគមចិនគ្រួសារត្រកូល លី។
កាលពីថ្ងៃទី ៦ ខែធ្នូ ឆ្នាំ ២០២២ អ្នកឧកញ៉ា លី យ៉ុងផាត់ ដែលជាសមាជិកព្រឹទ្ធសភា ជាម្ចាស់ទូរទស្សន៍ PNN ត្រូវបានព្រះមហាក្សត្រតែងតាំងជាទីប្រឹក្សាផ្ទាល់របស់សម្តេចតេជោ ហ៊ុន សែន នាយករដ្ឋមន្ត្រី បន្ថែមលើមុខងារបច្ចុប្បន្ន។
បើតាមព្រះរាជក្រឹត្យ មុខងារជាទីប្រឹក្សាផ្ទាល់របស់សម្តេចតេជោនាយករដ្ឋមន្ត្រី មានឋានៈស្មើរដ្ឋមន្ត្រី ហើយមុខងារនេះ អ្នកឧកញ៉ាមិនមានប្រាក់បំណាច់មុខងារឡើយ៕ អត្ថបទ៖ មេទ័ព001
