ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ត្រាស់បង្គាប់ដំឡើងឋានៈលោក គឹម រស្មី ជាទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រី មានឋានៈស្មើ «រដ្ឋមន្ត្រី» នៅថ្ងៃទី០៨ ខែមិថុនា ឆ្នាំ២០២៣។
ឧត្តមសេនីយ៏ឯកផ្កាយ ៣ គឹម រស្មី បច្ចុប្បន្នកំពុងកាន់តួនាទីជាអគ្គលេខាធិការរងក្រសួងការពារជាតិ ទទួលបន្ទុកការងារមជ្ឈមណ្ឌលបណ្តុះបណ្តាលការងាររដ្ឋបាល នៃកងយោធពលខេមរភូមិន្ទ។ លោកក៏ជាអនុប្រធានគណៈកម្មការដឹកនាំការងារហ្វឹកហ្វឺន អប់រំចិត្តសាស្រ្តប្រវត្តិសាស្ត្រយោធា និងសណ្តាប់ធ្នាប់ នៃក្រសួងការពារជាតិ។
គួររម្លឹកថា ឧត្តមសេនីយ៏ឯក គឹម រស្មី ធ្លាប់ទទួលបានការតែងតាំងជាជំនួយការផ្ទាល់សម្តេចតេជោ ហ៊ុន សែន នាយករដ្ឋមន្ត្រី មានឋានៈស្មើ «អនុរដ្ឋលេខាធិការ» កាលពីថ្ងៃទី១៨ ខែកញ្ញា ឆ្នាំ២០១៨។ ក្រោយមក លោកក៏ត្រូវបានប្រមុខរដ្ឋស្តីទី សម្តេចវិបុលសេនាភក្តី សាយ ឈុំ ត្រាស់បង្គាប់តែងតាំងជាទីប្រឹក្សាផ្ទាល់សម្តេចតេជោ ហ៊ុន សែន មានឋានៈស្មើ «រដ្ឋលេខាធិការ» បន្ថែមលើមុខងារបច្ចុប្បន្ន កាលពីថ្ងៃទី២៤ ខែសីហា ឆ្នាំ២០២២។
លោក គឹម រស្មី ដែលជាស្វាមីរបស់លោកជំទាវ ម៉ែន ចាន់ណារី ក៏ធ្លាប់ត្រូវបានព្រះមហាក្សត្រ ចេញព្រះរាជក្រឹត្យត្រាស់បង្គាប់តែងតាំងជា «ឧកញ៉ា» ផងដែរ កាលពីថ្ងៃទី១០ ខែមករា ឆ្នាំ២០១៨ ប៉ុន្តែត្រូវបានសម្តេចវិបុលសេនាភក្តី សាយ ឈុំ ប្រមុខរដ្ឋស្តីទី សម្រេចបញ្ចប់គោរមងារ «ឧកញ៉ា» រួមជាមួយនាយទាហានជាន់ខ្ពស់នៃកងយោធពលខេមរភូមិន្ទ ចំនួន៧៤រូបផ្សេងទៀត កាលពីថ្ងៃទី២៦ ខែកញ្ញា ឆ្នាំ២០១៩។
ការបញ្ចប់គោរមងារ «ឧកញ៉ា» ខាងលើនេះ គឺបន្ទាប់ពីកិច្ចប្រជុំគណៈរដ្ឋមន្ត្រីកាលពីថ្ងៃទី៣០ ខែសីហា ឆ្នាំ២០១៩ សម្តេចតេជោ ហ៊ុន សែន បានបញ្ជាយ៉ាងដាច់ណាត់មិនឱ្យកងកម្លាំងប្រដាប់អាវុធ ទាំងយោធា នគរបាល និងកងរាជអាវុធហត្ថ មានងារជា «ឧកញ៉ា» តទៅទៀតនោះទេ។ កងកម្លាំងប្រដាប់អាវុធណា ដែលមានងារជា «ឧកញ៉ា» ធ្វើការជ្រើសរើសជាបន្ទាន់ ថាតើត្រូវយកងារ «ឧកញ៉ា» ឬយកតួនាទីជាយោធា៕
