លោកឧកញ៉ា សំ សុខនឿន ប្រធានសមាគមអចលនទ្រព្យសកល និងជាអ្នកជំនាញអចលនទ្រព្យនៅកម្ពុជា យល់ថា តម្រូវការលំនៅឋាននៅកម្ពុជាបច្ចុប្បន្ន មានចំនួន ៧ប្រភេទ ដែលស្ថិតក្នុងតម្លៃចាប់ពី ១៥,០០០ដុល្លារអាមេរិក រហូតដល់ជាង ១,០០០,០០០ដុល្លារអាមេរិក។
ឧកញ៉ា សំ សុខនឿន សូមបែងចែកតម្រូវការលំនៅឋានជា ៧ប្រភេទ ដូចខាងក្រោម៖
១. ១៥,០០០ ដុល្លារ – ក្រោម ៥០,០០០ ដុល្លារ
២. ៥០,០០០ ដុល្លារ – ក្រោម ១០០,០០០ ដុល្លារ
៣. ១០០,០០០ ដុល្លារ – ក្រោម ២០០,០០០ ដុល្លារ
៤. ២០០,០០០ ដុល្លារ – ក្រោម ៣០០,០០០ ដុល្លារ
៥. ៣០០,០០០ ដុល្លារ – ក្រោម ៥០០,០០០ ដុល្លារ
៦. ៥០០,០០០ ដុល្លារ – ក្រោម ១,០០០,០០០ ដុល្លារ
៧. ១,០០០,០០០ ដុល្លារ ឡើងទៅ។
លោកឧកញ៉ា បានលើកជាសំនួរថា តើតម្រូវការលំនៅឋាននៅកម្ពុជាបច្ចុប្បន្នពិតជាលើសគ្រប់ចំណែកទីផ្សារមែនដែរឬទេ? លោកឧកញ៉ា បន្តថា តម្រូវការលំនៅឋាន ដែលកម្មករសំណង់ កម្មកររោងចក្រ អ្នកអនាម័យ អ្នករត់ម៉ូតូឌុប បុគ្គលិកក្រុមហ៊ុនសាមញ្ញ គ្រូបង្រៀន នាយទាហាន អាជីវករលក់ដូរសាមញ្ញ -ល- គឺ លំនៅឋាន ដែលមានតម្លៃពី ១៥,០០០ ដុល្លារ ទៅក្រោម ៥០,០០០ ដុល្លារ។ លំនៅឋាននេះ ត្រូវតែជាលំនៅឋានដែលស្ថិតនៅក្បែរ ឬមិនឆ្ងាយពីកន្លែងពួកគាត់ធ្វើការពេកនោះទេ។ ចុះចំណែកអតិថិជនប្រភេទណា ដែលមានតម្រូវការ ពី ៥០,០០០ ដុល្លារ ទៅក្រោម ១០០,០០០ ដុល្លារ? ហើយបងប្អួនណាខ្លះត្រូវការលំនៅឋាន ដែលមានតម្លៃ ក្រោម ៥០,០០០ ដុល្លារ ហើយនៅក្បែរកន្លែង ដែលបងប្អូនកំពុងធ្វើការ?
ជារួម លោកឧកញ៉ា សំ សុខនឿន យល់ឃើញថា កម្ពុជាពិតជាមានតម្រូវការខ្ពស់ សម្រាប់លំនៅឋានតម្លៃសមរម្យ ហើយមិនឆ្ងាយពីកន្លែងធ្វើការ។
សូមជម្រាបថា រាជរដ្ឋាភិបាលកម្ពុជា ក៏បានដាក់ចេញនូវគោលនយោបាយជាតិស្តីពីលំនៅឋាន និងគោលនយោបាយស្តីពីការលើកទឹកចិត្ត និងការបង្កើតកម្មវិធីជាតិ សម្រាប់ការអភិវឌ្ឍលំនៅឋានតម្លៃសមរម្យ ក្នុងគោលដៅផ្តល់ឱកាសជូនប្រជាជនទូទាំងប្រទេស មានលំនៅឋានសមរម្យអាចរស់នៅ បានប្រកបដោយផាសុកភាព សុវត្ថិភាព និងសេចក្តីថ្លៃថ្នូរ ជាពិសេសប្រជាពលរដ្ឋ ដែលមានប្រាក់ចំណូលមធ្យម ប្រាក់ចំណូលទាប និងជនងាយរងគ្រោះ៕
