លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា យល់ឃើញថា បើកម្ពុជាអាចបង្កើតឱ្យមានតុលាការពាណិជ្ជកម្ម និងតុលាការការងារ ក្នុងពេលឆាប់ៗខាងមុខនេះ នោះនឹងក្លាយជាឈ្នាន់មួយទៀត ក្នុងការទាក់ទាញអ្នកវិនិយោគទាំងក្នុងស្រុក និងក្រៅស្រុក ឱ្យមកបណ្តាក់ទុកនៅកម្ពុជាកាន់តែច្រើន ព្រោះពួកគេកាន់តែមានជំនឿចិត្តលើប្រព័ន្ធច្បាប់កម្ពុជា។
កាលព្រឹកថ្ងៃទី២៦ ខែមិថុនា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសដែលអញ្ជើញចូលរួមជាអធិបតីសម្ពោធដាក់ឱ្យប្រើប្រាស់អគារសាលាយុត្តិធម្ម បានថ្លែងជំរុញឱ្យពន្លឿននូវការរៀបចំតុលាការពាណិជ្ជកម្ម ដើម្បីសម្រួលដំណើរការវិនិយោគឱ្យកាន់តែប្រសើរ។ ជាមួយគ្នានោះ សម្តេចបានចាត់ឱ្យ ក្រសួងយុត្តិធម៌ត្រូវរៀបចំក្របខ័ណ្ឌច្បាប់ ក៏ដូចជាហេដ្ឋារចនាសម្ព័ន្ធនានា ដើម្បីពន្លឿនដំណើរការតុលាការពាណិជ្ជកម្ម និងតុលាការការងារប្រកបដោយគុណភាព តម្លាភាព និងភាពជឿទុកចិត្តបាន សម្រាប់បង្កើនជំនឿទុកចិត្តលើការវិនិយោគ និងការធ្វើធុរកិច្ចនៅកម្ពុជា។
លោកឧកញ៉ា លឹម ហេង ក្នុងនាមសភាពាណិជ្ជកម្ម និងវិស័យឯកជន សូមអបអរសាទរ និងសូមស្វាគមន៍នូវការជំរុញឱ្យកើតនូវតុលាការពាណិជ្ជកម្មនេះឡើង។ លោកឧកញ៉ា បន្តថា កន្លងមកយើងមានវិវាទផ្នែកពាណិជ្ជកម្ម ដូចជាទំនាស់ផលប្រយោជន៍ ឬការជួញដូរ គែតែងដោះស្រាយនៅតុលាការទូទៅ រួមទាំងវិវាទការងារផងដែរ។ ការបង្កើតតុលាការពាណិជ្ជកម្ម និងតុលាការការងារ នឹងផ្តល់ផលប្រយោជន៍ដល់អ្នកវិនិយោគ ទាំងក្នុងស្រុក និងបរទេស ដែលធ្វើឱ្យពួកគេកាន់តែមានជំនឿទុកចិត្តលើប្រព័ន្ធច្បាប់របស់កម្ពុជាបន្ថែមទៀត។ កន្លងមក ពេលមានវិវាទទាំងអស់នេះ យើងតែងដោះស្រាយនៅតុលាការស៊ីវិលទូទៅ ឃើញថាត្រូវចំណាយថវិកា និងពេលវេលាយូរ។ កន្លងមកសភាពាណិជ្ជកម្ម ក៏មានក្រុមការងារធ្វើការជាមួយក្រសួងយុត្តិធម៌ ក្នុងរយៈពេលជាង ២ឆ្នាំហើយ ដើម្បីជំរុញឱ្យកើតមានតុលាការពាណិជ្ជកម្មឡើង ក្នុងនោះក៏បានឯកភាពគ្នា ធ្វើយ៉ាងណារៀបចំនីតិវិធីឱ្យបានល្អ ក្នុងការកាត់ក្តី ដោយកាត់ក្តីឱ្យបានលឿន តម្លាភាព យុត្តិធម៌ ហើយអាចទទួលយកបានទាំងអស់គ្នា។
លោកឧកញ៉ា បានឱ្យដឹងបន្ថែមថា ក្រុមការងារសភាពាណិជ្ជកម្ម ក៏បានចូលរួមក្នុងការរៀបចំតុលាការពាណិជ្ជកម្មនេះ តាំងពីទើបផ្ទុះកូវីដ-១៩ឡើង និងប្រជុំតាមអនឡាញផង ប្រជុំផ្ទាល់ផង ជាមួយគ្នានេះ តាមនីតិវិធីច្បាប់ ប្រហែលជានឹងមានទីប្រឹក្សាពាណិជ្ជកម្ម ដូច្នេះក៏ត្រូវការសមាសភាពពីសភាពាណិជ្ជកម្ម ដើម្បីចូលរួមដោះស្រាយកាត់ក្តីក្នុងរឿងវិវាទនីមួយៗផងដែរ។
លោកឧកញ៉ា លឹម ហេង បានបញ្ជាក់បន្ថែមយ៉ាងដូច្នេះថា៖ “សព្វថ្ងៃ ទោះយើងមិនទាន់មានតុលាការពាណិជ្ជកម្មពិតមែន តែយើងឃើញថា អ្នកវិនិយោគក្នុងស្រុក និងបរទេស មានកំណើនជារៀងរាល់ឆ្នាំ ហើយកំណើនសេដ្ឋកិច្ចយើងក៏ល្អប្រសើរ ដោយសារសន្តិភាព សុខសុវត្ថិភាព និងស្ថេរភាពនយោបាយ។ បើយើងមានតុលាការពាណិជ្ជកម្មទៀត នឹងក្លាយជាឈ្នាន់មួយទៀត ដែលធ្វើឱ្យអ្នកវិនិយោគកាន់តែមានទំនុកចិត្ត ដើម្បីមកបណ្តាក់ទុននៅប្រទេសកម្ពុជា ដោយគ្មានហានិភ័យ។ សម្រាប់អ្នកវិនិយោគ មិនថាក្នុងស្រុកឬបរទេសទេ តែងចង់បានប្រព័ន្ធច្បាប់មួយគ្រប់គ្រងដោយប្រសិទ្ធភាព ដោយតម្លាភាព ដោយយុត្តិធម៌ បើសិនជាមានវិវាទកើតឡើង ដែលជាទំនុកចិត្តសម្រាប់អ្នករកស៊ី”។
គួរបញ្ជាក់ថា ប្រព័ន្ធតុលាការកម្ពុជាបច្ចុប្បន្ន បានបែងចែកតុលាការជា៣ថ្នាក់ រួមមាន សាលាដំបូងរាជធានី-ខេត្ត សាលាឧទ្ធរណ៍ (តាមតំបន់ឬភូមិភាគ) និងតុលាការកំពូល។ តុលាការទាំង៣ថ្នាក់នេះ មានអំណាចជំរះក្តីគ្របដណ្តប់ទៅលើគ្រប់រឿងក្តីទាំងអស់ រួមទាំងរឿងក្តីរដ្ឋបាល វិវាទពាណិជ្ជកម្ម និងវិវាទការងារ ផងដែរ៕
