លោកឧកញ៉ា អុឹង ប៊ុនហ៊ូវ ប្រធានអគ្គនាយក ក្រុមហ៊ុន អាយអិនជី ហូលឌីង (ING Holdings) ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ផ្តល់គោរមងារជា «អ្នកឧកញ៉ា» នៅថ្ងៃទី០៨ ខែមេសា ឆ្នាំ២០២៣។
ការផ្ដល់គោរមងារ «អ្នកឧកញ៉ា» ជូនឧកញ៉ា អុឹង ប៊ុនហូវ គឺឆ្លើយតបនឹងគុណបំណាច់របស់ លោកឧកញ៉ា ដែលជារឿយៗ តែងតែលះបង់ទាំងពេលវេលា និងធនធានថវិកា ជួយក្នុងសកម្មភាពសប្បុរធម៌នានាជូនជាតិ ប្រជាជន និងរាជរដ្ឋាភិបាលកម្ពុជា។ ជាក់ស្តែង កាលពេលថ្មីៗកន្លងទៅនេះ លោកឧកញ៉ាបានបរិច្ចាគថវិកា ២០ម៉ឺនដុល្លារ ជូនដល់រាជរដ្ឋាភិបាលកម្ពុជា ដើម្បីដោះស្រាយបញ្ហាមីន និងឧបត្ថម្ភថវិកាចំនួន ១០,០០០ ដុល្លារ ដើម្បីរួមចំណែកជាមួយសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ក្នុងការចុះពិនិត្យ និងព្យាបាលជំងឺជូនប្រជាពលរដ្ឋក្រីក្រទូទាំងប្រទេសដោយឥតគិតថ្លៃ ព្រមទាំងការចូលរួមបរិច្ចាគជួយសកម្មភាពមនុស្សធម៌ជាច្រើនទៀត។
ឧកញ៉ា អុឹង ប៊ុនហ៊ូវ ក៏បានទទួលគ្រឿងឥស្សរិយយស «ជាតូបការ» ពីព្រះមហាក្សត្រ និងបំពាក់ដោយផ្ទាល់ពីសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីព្រឹកថ្ងៃចន្ទ ទី២៤ ខែមេសា ឆ្នាំ២០២៣។ លោកឧកញ៉ា ជាសហស្ថាបនិកក្រុមហ៊ុន អាយអិនជី ហូលឌីង ជាមួយអ្នកឧកញ៉ា លឹម រស់ និងឧកញ៉ា លឹម ប៊ុនសួរ ដែលបានបង្កើតឡើង នៅឆ្នាំ២០០៥។ បច្ចុប្បន្ន ក្រុមហ៊ុនអភិវឌ្ឍន៍អចលនទ្រព្យដ៏ធំមួយនៅកម្ពុជាមួយនេះ កំពុងអភិវឌ្ឍគម្រោងធំៗលើទីតាំង៤ សំខាន់ៗគឺ ភាគខាងត្បូងរាជធានីភ្នំពេញ ភាគខាងកើតរាជធានីភ្នំពេញ ខេត្តសៀមរាប និងខេត្តព្រះសីហនុ៕
