លោកឧកញ៉ា អេង ចំរើន អគ្គនាយកក្រុមហ៊ុន មង្គល គ្រុប កាលពីថ្ងៃទី១២ ខែកក្កដា ម្សិលមិញនេះ បានទទួលសារអប់រំដ៏ល្អពីឪពុករបស់ខ្លួន ដែលក្នុងនោះលោកឪពុករបស់លោក បានសង្កត់ធ្ងន់និងផ្តាំផ្ញើថា «ទោះមាន ឬក្រ សូមកូនកុំភ្លេចកន្លែងកូនកើត»។
ឧកញ៉ា អេង ចំរើន បានបង្ហាញរូបភាពចតរថយន្តទំនើប នៅមុខផ្ទះចំណាស់មួយ ភ្ជាប់ជាមួយនឹងសាររៀបរាប់យ៉ាងដូច្នេះថា៖ “សារពីឪពុកចាស់ម្នាក់÷ ឡានរបស់កូនថ្លៃ សម្តីកូនក៏ថ្លោស ផ្ទះកូនក៏ធំ ទ្រនំកូនក៏ខ្ពស់ ឋានៈកូនក៏ខ្ពង់ខ្ពស់ តែកូនត្រូវចាំ «ទោះមាន ឬក្រ សូមកូនកុំភ្លេចកន្លែងកូនកើត» ទោះផ្ទះមួយនេះមិនល្អដូចផ្ទះថ្មីរបស់កូន ឬមិនមានតម្លៃស្មើនឹង សំបកកង់ឡានរបស់កូនក៏ដោយ តែវាគឺជាកន្លែងតែមួយគត់ ដែលធ្វើឱ្យកូនមានថ្ងៃនេះ។ លោកឪពុករបស់កូនខ្ពង់ខ្ពស់”។
សូមជម្រាបថា លោក អេង ចំរើន ទើបត្រូវបានព្រះមហាក្សត្រចេញព្រះរាជក្រឹត្យផ្តល់គោរមងារជា «ឧកញ៉ា» កាលពីថ្ងៃទី១ ខែកក្កដា ថ្មីៗកន្លងទៅនេះ។ លោកជាអ្នកជំនួញពហុវិស័យមួយរូប និងជាម្ចាស់គ្លីនិកឯកទេសមង្គល (Mongkul medical specialist clinic), សណ្ឋាគារ មង្គលប៊ិច (Mongkul Beach hotel co ltd), មង្គល អីនអឺណេសសិនណល់ (Mongkul International co ltd) និង មង្គល អិនវេសមិន (Mongkul Investment co ltd)។
លោកឧកញ៉ា ក៏ជាទីប្រឹក្សារឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃរដ្ឋសភា។ រីឯការងារសង្គម និងកិច្ចការមូលដ្ឋានផ្សេងទៀត លោកឧកញ៉ា ជាប្រធានសមាគមយុវជនក្រុម៨ ខេត្តព្រះសីហនុ និងជាប្រធានក្រុមការងារយុវជនគណបក្សប្រជាជនកម្ពុជា ចុះមូលដ្ឋានឃុំក្រែក ស្រុកពញាក្រែក ខេត្តត្បូងឃ្មុំ ផងដែរ៕
