លោកឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជា កាលពីរសៀលថ្ងៃទី១៩ ខែកក្កដា ឆ្នាំ២០២៣ បានជួបពិភាក្សាការងារជាមួយ កញ្ញា Marisa Haruta ប្រធានតំណាងអង្គការពាណិជ្ជកម្មក្រៅប្រទេសជប៉ុន (JETRO) ព្រមទាំងសហការី ទាក់ទងទៅនឹងបច្ចេកវិទ្យាទំនើបៗ ដែលអាចធ្វើឱ្យប្រសើរឡើងដល់វិស័យកសិកម្ម ការតាមដានការបំភាយឧស្ម័ន ការកាត់បន្ថយការបំភាយឧស្ម័ននៅកម្ពុជា។
បច្ចេកវិទ្យាទាំងនោះ អាចឱ្យយើងធ្វើការវាស់វែងកម្រិតនៃការបំភាយឧស្ម័ន និងអាចផ្សារភ្ជាប់ទៅនឹងក្រុមហ៊ុនដែលមានតម្រូវការក្នុងការទិញឧស្ម័ននោះផងដែរ។ គូសបញ្ជាក់ផងដែរថា ជាបទពិសោធន៍ការងារកន្លងមក ការគណនាកម្រិតឧស្ម័នដែលកាត់បន្ថយ ជាមធ្យម គឺមានបរិមាណ ៣,៥តោន/ហិកតា ក្នុងមួយរដូវ និងមានតម្លៃប្រមាណ ២០ដុល្លា/តោន។ យ៉ាងណាមិញ ភាគីទាំងពីរ នឹងពិភាក្សាលម្អិតអំពីគម្រោងសាកល្បងរួមគ្នា លើគម្រោងការបំភាយកាបូន និងការងារឥណទានកាបូន។
សូមជម្រាបថា លោកឧកញ៉ា ចាន់សុឃាំង ក្នុងនាមជាប្រធានសហព័ន្ធស្រូវអង្ករកម្ពុជា តែងតែខិតខំធ្វើកិច្ចសហការជាមួយស្ថាប័នជាតិ និងអន្តរជាតិ ដើម្បីធ្វើយ៉ាងណាចូលរួមចំណែកលើកកម្ពស់ ទិន្នផលស្រូវ អង្ករ របស់ប្រជាពលរដ្ឋនៅគ្រប់បណ្តាខេត្ត និងឱ្យមានទីផ្សារកាន់តែលក់បានថ្លៃជាងមុនផងដែរ៕
