អ្នកឧកញ៉ា គួច ម៉េងលី ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន បានបញ្ចេញនូវទស្សនៈមួយចំនួន ចំពោះការកែទម្រង់របស់ក្រសួងអប់រំ យុវជន និងកីឡា ដែលគ្រោងឱ្យសិស្សដែលប្រឡងបាក់ឌុបជាប់និទ្ទេស A, B, C មានសិទ្ធិអាចចូលបង្រៀនបាន ហើយសិស្សផ្សេងទៀត ត្រូវឆ្លងកាត់ការប្រឡងជ្រើសរើស។
តាមការសម្រួចអាទិភាព នៃកំណែទម្រង់វិស័យអប់រំ សម្រាប់ឆ្នាំ២០២៣-២០២៨ របស់ក្រសួងអប់រំ បានបង្ហាញពីការកំណត់កូតាសម្រាប់ «សិស្សនិទ្ទេស A, B, C ដើម្បីជ្រើសរើសចូលធ្វើគ្រូបង្រៀន» ដោយឆ្លងកាត់ការវាយតម្លៃតាមលំដាប់ពិន្ទុប្រឡង។ ដោយឡែក កូតានៅសល់សម្រាប់បេក្ខជនផ្សេងទៀត ត្រូវឆ្លងកាត់ការប្រឡង ក្រោមការដឹកនាំដោយក្រុមការងារថ្នាក់ជាតិ និងចូលរួមពីតំណាងទីស្ដីការគណៈរដ្ឋមន្ត្រី។
អ្នកឧកញ៉ា គួច ម៉េងលី បានបង្ហាញការយល់ឃើញថា បើកំណត់យកសិស្សកម្រិតបាក់ឌុប និទ្ទេស A, B ឬ C ធ្វើជាគ្រូបង្រៀន គឺបានតែការបង្រៀននៅថ្នាក់បឋមសិក្សា តាមទីជនបទប៉ុណ្ណោះ។ អ្នកឧកញ៉ា បានបន្តថា យើងគួរតែពង្រឹង និងពង្រីកសក្តានុពលសាលាគរុកោសល្យឱ្យបានច្រើន ត្រូវបណ្តុះបណ្តាលធនធានគ្រូឱ្យបានច្រើន ដើម្បីធនធានមនុស្សទៅបង្រៀនតាមសាលាគ្រប់កម្រិត ដើម្បីឱ្យសិស្សទទួលបានចំណេះដឹងច្រើន។
អ្នកឧកញ៉ា បានបន្ថែមទៀតថា អ្វីដែលយើងគ្រោងធ្វើក្នុងគោលនយោបាយនេះ គឺល្អហើយដើម្បីឱ្យឱកាសចូលបម្រើការងារជាគ្រូបង្រៀនកាន់តែច្រើនទៅតាមមូលដ្ឋានរហូតដល់តាមភូមិ ប៉ុន្តែវាពុំបានជួយប៉ុន្មានដល់គុណភាពនៃការអប់រំធនធានមនុស្សទេ ព្រោះគ្រូបង្រៀនទើបចប់បាក់ឌុប ពុំទាន់មានចំណេះដឹងពេញលក្ខណៈនោះទេ។ បើយើងបណ្តុះបណ្តាលគ្រូគរុកោសល្យឱ្យបានច្រើន ហើយចេញទៅបង្រៀន នោះទើបទទួលបានធនធានមនុស្សប្រសើរជាង។
ទាក់ទងនឹងកំណែទម្រង់នេះ អ្នកឧកញ៉ា គួច ម៉េងលី ក្នុងនាមជាម្ចាស់សាលាឯកជន ដែលមានបទពិសោធន៍ច្រើនលើវិស័យអប់រំ យល់ឃើញថា គោលនយោបាយខាងលើ ហាក់ដូចជាការដើរថយក្រោយវិញ ប៉ុន្តែលោកមិនច្បាស់ថា ក្រសួងនឹងមានផែនការលម្អិតច្បាស់លាស់ ឬអាចល្អត្រង់ចំណុចណាវិញ។ ទោះយ៉ាងណា អ្នកឧកញ៉ា នៅតែយល់ថា គួរតែពង្រឹងសាលាគរុកោសល្យ និងពង្រីកការបណ្តុះបណ្តាលគ្រូគរុកោសល្យ ឱ្យបានចំនួនច្រើន ដើម្បីចេញទៅបង្រៀនឱ្យសិស្សទទួលបានចំណេះដឹង កាន់តែខ្ពស់ឡើង៕
