គោរមងារ «ឧកញ៉ា និងអ្នកឧកញ៉ា» ត្រូវបានព្រះមហាក្សត្រ ផ្តល់ជូនដល់អ្នកជំនួញ សប្បុរសជន ដើម្បីលើកទឹកចិត្តដល់រូបវន្តបុគ្គលជាប្រពលរដ្ឋខ្មែរ ដែលមានគុណបំណាច់ផ្ទាល់ខ្លួនចូលរួមអភិវឌ្ឍ និងកសាងជាតិ តាមសំណើររបស់នាយករដ្ឋមន្រ្តី។
យោងតាមព្រះរាជក្រឹត្យត្រាស់បង្គាប់ផ្ដល់គោរមងារ អ្នកឧកញ៉ា ដែលគេហទំព័រឧកញ៉ាញូស៍ទទួលបាន នៅក្នុងខែសីហា ឆ្នាំ២០២៣នេះ មានឧកញ៉ាដល់ទៅ ២៩រូប ទទួលបានគោរមងារជា «អ្នកឧកញ៉ា» ខណៈដែល គោរមងារជា «ឧកញ៉ា» មានអ្នកជំនួញ សប្បុរសជនចំនួន៥រូបទទួលបាន។
គិតត្រឹមពាក់កណ្ដាលឆ្នាំ២០២៣នេះ ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ផ្ដល់គោរមងារឧកញ៉ា អ្នកឧកញ៉ា ដល់សប្បុរសជន អ្នកជំនួញក្នុងវិស័យអចលនទ្រព្យ វិស័យសំណង់ កសិកម្ម ឧស្សាហកម្ម ព្រមទាំងវិស័យជាច្រើនទៀត មានចំនួនជាង ១,៣០០នាក់។
សូមបញ្ជាក់ថា ការទទួលបានគោរមងារជា លោកអ្នកឧកញ៉ា អ្នកឧកញ៉ា និងឧកញ៉ា ធ្វើឡើង ក្រោយពីរូបវន្តបុគ្គលជាប្រជាពលរដ្ឋខ្មែរ មានគុណបំណាច់ក្នុងការចូលរួមអភិវឌ្ឍនិងកសាងជាតិ មានជាអាទិ៍ការផ្តល់អំណោយជាថវិកា ការចូលរួមបរិច្ចាគធនធានទ្រព្យសម្បត្តិ សម្ភារបរិក្ខានានាជូនរដ្ឋ ការកសាងហេដ្ឋារចនាសម្ព័ន្ធរូបវន្តនានា ដែលក្នុងនោះមានផ្លូវ ស្ពាន សាលារៀន វត្ត អាគារសាធារណៈជាដើម ស្នាដៃពិសេសក្នុងវិស័យណាមួយ ឬរបកគំហើញនូវបច្ចេកវិទ្យាថ្មីៗណាមួយ ដែលមានអត្ថប្រយោជន៍សម្រាប់សង្គមជាតិ៕
អត្ថបទ៖ សុធា
