កូនប្រុសឧកញ៉ាបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ ស្ថាបនិក និងជាអគ្គនាយកប៊ែលធី គ្រុប ចំនួន ២រូប គឺលោក លី ណាវុឌ្ឍ និងលោក លី ប៊ុនឆៃ ត្រូវបានព្រះមហាក្សត្រ ចេញព្រះរាជក្រឹត្យតែងតាំងជា ទីប្រឹក្សាទីស្តីការគណៈរដ្ឋមន្ត្រី ឋានៈស្មើ អនុរដ្ឋលេខាធិការ ដូចគ្នា កាលពីថ្ងៃទី២៦ ខែសីហា ឆ្នាំ២០២៣។
តាមរយៈព្រះរាជក្រឹត្យ ដែលមានការតែងតាំង និងផ្តល់ឋានៈទីប្រឹក្សាទីស្តីការគណៈរដ្ឋមន្ត្រី សរុបចំនួន ៦១រូបនោះ លោក លី ណាវុឌ្ឍ និងលោក លី ប៊ុនឆៃ ត្រូវបានតែងតាំងជាទីប្រឹក្សា និងផ្តល់ឋានៈស្មើ អនុរដ្ឋលេខាធិការ និងមានងារជា «ឯកឧត្តម» ដូចគ្នា។ លោក លី ណាវុឌ្ឍ បច្ចុប្បន្នជាអគ្គនាយករង នៃប៊ែលធី គ្រុប និងជាសាកលវិទ្យាធិការ នៃសាកលវិទ្យាល័យ ប៊ែលធី អន្តរជាតិ ចំណែកឯលោក លី ប៊ុនឆៃ ក៏ជាអគ្គនាយករងប៊ែលធី គ្រុប និងជាប្រធានគណៈគ្រប់គ្រងនាយកសាខា នៅសាលសហសិក្សា នៃសាលា ប៊ែលធី អន្តរជាតិទី១០ (សាខាអាងទឹកអូឡាំពិក) ដែលសិស្សភាគច្រើនស្គាល់ច្បាស់ថា ជាគ្រូវិន័យ ដ៏ស្រស់សង្ហា។
សូមជម្រាបថា ឧកញ៉ាបណ្ឌិត លី ឆេង តំណាងរាស្ត្រមណ្ឌលរាជធានីភ្នំពេញ ស្ថាបនិក និងជាអគ្គនាយកប៊ែលធី គ្រុប បច្ចុប្បន្នមានតួនាទីជា អនុប្រធានគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា នីតិកាលទី៧។ លោកឧកញ៉ា ក៏មានកូនប្រុសម្នាក់ទៀត គឺលោក លី សុវណ្ណ ជាអគ្គនាយករងនៃក្រុមហ៊ុន ប៊ែលធី គ្រុប និងជាម្ចាស់បុរី លី សុវណ្ណ ព្រមទាំងជាមន្ត្រីនគរបាលជាន់ខ្ពស់មួយរូប ក្នុងក្របខណ្ឌមន្ត្រីនគរបាលជាតិកម្ពុជា នៃក្រសួងមហាផ្ទៃ ផងដែរ៕
