កាលពីថ្ងៃទី៦ ខែកញ្ញា ឆ្នាំ២០២៣ ម្សិលមិញនេះ សម្តេចវិបុលសេនាភក្តី សាយ ឈុំ ក្នុងព្រះបរមនាមនិងតាមព្រះរាជត្រាស់បង្គាប់ ប្រមុខរដ្ឋស្តីទី តាមសេចក្តីក្រាបបង្គំទូលថ្វាយរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញព្រះរាជក្រឹត្យ ស្តីពីគោលការណ៍សម្រាប់ការតែងតាំងទីប្រឹក្សា និងជំនួយការ នៅក្នុងអង្គការនីតិប្រតិបត្តិ។
ព្រះរាជក្រឹត្យនេះ មានវិសាលភាពអនុវត្តចំពោះទីប្រឹក្សា និងជំនួយការទាំងអស់ នៅក្នុងអង្គការនីតិប្រតិបត្តិ (រួមទាំងថ្នាក់ដឹកនាំមកពីវិស័យឯកជន អ្នកឧកញ៉ា ឧកញ៉ា) លើកលែងតែទីប្រឹក្សា និងជំនួយការរបស់ក្រុមប្រឹក្សា អាជ្ញាធរ គណៈកម្មាធិការ ឬយន្តការនានារបស់រាជរដ្ឋាភិបាល ដែលត្រូវកំណត់ដោយលិខិតបទដ្ឋានគតិយុត្តដោយឡែក។
មាត្រា៥ នៃព្រះរាជក្រឹត្យនេះ បានចែងថា ការតែងតាំងជាទីប្រឹក្សា និងជំនួយការរបស់រាជរដ្ឋាភិបាល ព្រមទាំងទីស្តីការគណៈរដ្ឋមន្ត្រី ក្រសួង និងរដ្ឋលេខាធិការនានា ចំណុះរាជរដ្ឋាភិបាល ត្រូវអវត្តលក្ខខណ្ឌដូចជា៖ បុគ្គលដែលជាសមាជិកក្នុងក្រុមប្រឹក្សាភិបាល ឬគ្រប់គ្រងក្រុមហ៊ុនឯកជន ឬបុគ្គលដែលទទួលបានគោរមងារឧកញ៉ា អាចទទួលការតែងតាំងជាទីប្រឹក្សា ឬជំនួយការរបស់រាជរដ្ឋាភិបាល ឬទីស្តីការគណៈរដ្ឋមន្ត្រី ឬក្រសួង-រដ្ឋលេខាធិការដ្ឋាននានាចំណុះរាជរដ្ឋាភិបាលបាន ក្នុងលក្ខខណ្ឌដែលមិនមានការផ្តល់ឋានៈស្មើ និងប្រាក់បំណាច់កម្រិតណាមួយឡើយ។
បន្ថែមពីនេះ មានត្រា៦ បានចែងថា បុគ្គលដែលជាសមាជិកក្នុងក្រុមប្រឹក្សាភិបាល ឬគ្រប់គ្រងក្រុមហ៊ុនឯកជន ឬបុគ្គលដែលទទួលបានគោរមងារឧកញ៉ា អាចទទួលការតែងតាំងជាទីប្រឹក្សា ឬជំនួយការរបស់នាយករដ្ឋមន្ត្រី ឧបនាយករដ្ឋមន្ត្រី ឬទេសរដ្ឋមន្ត្រី ក្នុងលក្ខខណ្ឌដែលមិនមានការផ្តល់ឋានៈស្មើ និងប្រាក់បំណាច់កម្រិតណាមួយឡើយ។
ដូច្នេះជារួមមក តាមរយៈព្រះរាជក្រឹត្យថ្មីនេះ អ្នកឧកញ៉ា ឧកញ៉ា អាចទទួលការតែងតាំងជាទីប្រឹក្សា ឬជំនួយការ រាជរដ្ឋាភិបាល ក្រសួង ស្ថាប័ន ឬថ្នាក់ដឹកនាំរាជរដ្ឋាភិបាលបាន ប៉ុន្តែមិនមានការផ្តល់ឋានៈស្មើ និងប្រាក់បំណាច់មុខងារ ដូចពេលមុននោះទេ។ គួរបញ្ជាក់ថា ព្រះរាជក្រឹត្យថ្មីនេះ ត្រូវបានបង្កើតឡើងក្នុងគោលបំណងពង្រឹងគោលការណ៍ឋានានុក្រមរដ្ឋបាល សំដៅលើកកម្ពស់ប្រសិទ្ធភាពការងារក្នុងរដ្ឋបាលសាធារណៈ ក៏ដូចជា លើកកម្ពស់ប្រសិទ្ធភាពការងាររបស់ទីប្រឹក្សា និងជំនួយការ នៅក្នុងអង្គការនីតិប្រតិបត្តិ៕
