លោកឧកញ៉ា តែ ប៉រហុង ម្ចាស់ភាគទុនិកតំណាងឱ្យក្រុមហ៊ុន TTP Groups Cambodia កាលពីរសៀលថ្ងៃសុក្រ ទី១៥ ខែកញ្ញា ឆ្នាំ២០២៣ បានជួបពិភាក្សាជាមួយ លោក Kasunori Kato អគ្គនាយកក្រុមហ៊ុន ILBRiLLE Co.,Ltd និងបានចុះអនុស្សរណៈយោគយល់គ្នា ស្តីពីការវិនិយោគទុនរួមគ្នាលើវិស័យបណ្តុះបណ្តាលជំនាញវិជ្ជាជីវៈ ដោយផ្តោតលើការតុបតែង និងកែសម្ជស្ស។
ពិធីចុះអនុស្សរណៈយោគយល់គ្នានេះ បានធ្វើឡើងនៅទីស្នាក់ការកណ្តាលក្រុមហ៊ុន TTP Groups Cambodia អាគារលេខ ១៦៨តេ មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ ក្នុងឱកាសនោះដែរ លោកឧកញ៉ា តែ ប៉រហុង ក៏បានជួបពិភាក្សាជាមួយលោក តាកាហាស៊ី ហ្វូមីអាគី (Takahashi Fumiaki) ប្រធានសមាគមជប៉ុនកម្ពុជា និងជាអតីតឯកអគ្គរាជទូតជប៉ុនប្រចាំកម្ពុជា និងលោក Kasunori Kato អគ្គនាយកក្រុមហ៊ុន ILBRiLLE Co.,Ltd និងមានការចូលរួមជាអធិបតីភាពដ៏ខ្ពង់ខ្ពស់ពី លោកឧកញ៉ា តែ តាំងប៉ ប្រធានក្រុមប្រឹក្សាភិបាល នៃសម្ព័ន្ធសមាគមសហគ្រាសធុនតូច និងមធ្យមកម្ពុជា បានចុះអនុស្សារណៈយោគយល់គ្នា ស្តីអំពីការវិនិយោគទុនរួមគ្នាលើវិស័យបណ្តុះបណ្តាលជំនាញវិជ្ជាជីវៈ ដោយផ្តោតលើការតុបតែង និងកែសម្ជស្ស រវាងក្រុមហ៊ុន TTP Groups Cambodia និងក្រុមហ៊ុន ILBRiLLE Co.,Ltd។
លោក Kasunori Kato បានមានមតិសំណេះសំណាល និងលើកឡើងថា លោកពិតជាមានសេចក្តីសោមនស្ស រីករាយណាស់ ដែលបានសហការជាមួយក្រុមហ៊ុន TTP Groups Cambodia ដោយលោកមានចំណាប់អារម្មណ៍លើវិស័យសំខាន់ៗពីរគឺ៖ ១.ការផលិតទំនិញកែច្នៃ ដែលប្រើប្រាស់វត្ថុធាតុដើមកម្ពុជា និងបច្ចេកទេសទំនើបជប៉ុន និង ២. ការបណ្តុះបណ្តាលជំនាញវិជ្ជាជីវៈ។
ជាចុងក្រោយ លោក តាកាហាស៊ី ហ្វូមីអាគី សូមកោតសរសើរ និងវាយតម្លៃខ្ពស់អំពីការសហការនេះ ដែលឆ្លុះបញ្ចាំងឱ្យឃើញថា ពិតជាមានភាពទំនាក់ទំនងយ៉ាងជិតស្និទ្ធរវាងភាគីទាំងពីរ។ ជាមួយគ្នានោះ លោកឧកញ៉ា តែ តាំងប៉ ប្រធានក្រុមប្រឹក្សាភិបាល នៃសម្ព័ន្ធសមាគមសហគ្រាសធុនតូច និងមធ្យមកម្ពុជា និងលោកឧកញ៉ា តែ ប៉រហុង ម្ចាស់ភាគទុនិកតំណាងឱ្យក្រុមហ៊ុន TTP Groups Cambodia ក៏បានថ្លែងអំណរគុណយ៉ាងជ្រាលជ្រៅចំពោះកិច្ចសហការជាមួយក្រុមហ៊ុនវិនិយោគទុនក្រុមហ៊ុន ILBRiLLE Co.,Ltd នេះផងដែរ៕
