លោកឧកញ៉ាបណ្ឌិត គីម ហ៊ាង ប្រធានស្ថាបនិក KW Cambodia និងជាអគ្គនាយកបុរី វិមានសំណាង បានអំពាវនាវឱ្យមានការផ្សព្វផ្សាយព័ត៌មានបែបវិជ្ជមានពីប្រទេសកម្ពុជា ឱ្យបានកាន់តែច្រើនឡើង ជាជាងផ្សព្វផ្សាយតែពីបញ្ហា ដែលមិនមានផលចំណេញអ្វីសោះឡើយ សម្រាប់សេដ្ឋកិច្ចរបស់ជាតិ។
ឧកញ៉ាបណ្ឌិត គីម ហ៊ាង ដែលមានបទពិសោធន៍ជាង ២០ឆ្នាំ លើវិស័យអចលនទ្រព្យ យល់ថាក្នុងដំណាក់កាលវិបត្តិជាសកល គ្រប់វិស័យ ពិសេសវិស័យអចលនទ្រព្យ សុទ្ធតែទទួលរងនូវផលប៉ះពាល់ ដូច្នេះ បើគ្រប់គ្នានិយាយតែបញ្ហា ហើយមិនមានដំណោះស្រាយ នោះលោកព្រួយបារម្ភខ្លាចថ្ងៃអនាគត វិស័យអចលនាទ្រព្យ នឹងអាក្រក់ដូចមាត់និយាយ។
ម្ចាស់បុរី វិមានសំណាង និងបុរី ខេអេស រ៉េស៊ីដេន រូបនេះ បានលើកឡើងក្នុងកម្មវិធី ស្ដីពីដំណោះស្រាយវិស័យអចលនទ្រព្យនៅកម្ពុជា កាលថ្ងៃទី១៦ ខែកញ្ញា ឆ្នាំ២០២៣ យ៉ាងដូច្នេះថា៖ “ខ្ញុំសំណូមពរទៅដល់អ្នកសារព័ត៌មាន និងប្រជាពលរដ្ឋ សម្រាប់ការផ្សព្វផ្សាយលើបណ្ដាញសង្គមនានា សូមផ្សព្វផ្សាយព័ត៌មានល្អៗឲ្យបានច្រើន។ ព័ត៌មានល្អ ទាក់ទងសង្គម ប្រទេសជាតិ សេដ្ឋកិច្ច នយោបាយ កសិកម្ម ទេសចរណ៍។ល។ រីឯព័ត៌មានមិនចាំបាច់លក្ខណៈបុគ្គល ឬគ្រោះថ្នាក់តិចតួច កុំព្យាយាមផ្សព្វផ្សាយច្រើនពេក ព្រោះវាមិនចំណេញអ្វីសោះសម្រាប់សង្គមជាតិ”។
លោកឧកញ៉ា បានបញ្ជាក់បន្ថែមថា ការផ្សព្វផ្សាយព័ត៌មានវិជ្ជមាន ទាំងក្របខណ្ឌស្ថាប័នព័ត៌មាន ឬបុគ្គល ទោះមិនអាចជួយអ្វីច្រើនដល់សង្គម ក៏មិនបង្កបញ្ហាបន្ថែមដល់សង្គមនោះដែរ។ សម្រាប់រូបលោកផ្ទាល់ លោកតែងណែនាំបុគ្គលិក និងសមាជិកទាំងអស់ ឱ្យផ្សព្វផ្សាយ មិនថាពាក់ព័ន្ធវិស័យអចលនទ្រព្យ ឬវិស័យអ្វីនោះទេ ត្រូវតែបង្កប់នូវគំនិតវិជ្ជមានជានិច្ច ព្រោះមានតែបុគ្គលវិជ្ជមានប៉ុណ្ណោះ ដែលនិយាយរឿងវិជ្ជមាន ហើយទទួលបានលទ្ធផលវិជ្ជមាន៕
