លោកស្រីឧកញ៉ា កែវ មុំ ប្រធានសភាមុខរបរ និងមីក្រូសហគ្រាសកម្ពុជា បានស្នើសុំដល់រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឱ្យជួយជ្រោមជ្រែងគាំទ្រផ្នែកបច្ចេកទេសនៃការគ្រប់គ្រងគុណភាពស្តង់ដា លើគម្រោងបង្កើតមជ្ឈមណ្ឌលពាណិជ្ជកម្មកម្ពុជា ដែលនឹងក្លាយជាទីតាំងប្រមូលផ្តុំផលិតផលក្នុងស្រុករបស់ខ្មែរ ដើម្បីអាចផ្សព្វផ្សាយ និងលក់ចែកចាយ ឱ្យបានទូលំទូលាយ ទាំងលើឆាកជាតិ និងអន្តរជាតិ។
សំណើសុំខាងលើនេះ បានធ្វើឡើងក្នុងឱកាសដែលលោកស្រីឧកញ៉ា ត្រូវបានលោក ហែម វណ្ណឌី រដ្ឋមន្ត្រីក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍ អនុញ្ញាតឱ្យចូលជួបសម្តែងការគួរសម និងពិភាក្សាការងារ នៅរសៀលថ្ងៃទី៣០ ខែកញ្ញា ឆ្នាំ២០២៣។
ក្នុងជំនួបនេះដែរ លោកស្រីឧកញ៉ា ប្រធានក្រុមប្រឹក្សាភិបាលសភាមុខរបរ និងមីក្រូសហគ្រាស ក៏បានស្នើសុំទៅរាជរដ្ឋាភិបាល ដើម្បីរៀបចំកែសម្រួលព្រះរាជក្រឹត្យ ស្តីពីការបង្កើតសភាមុខរបរ និងមីក្រូសហគ្រាស ឡើងវិញ ឱ្យស្របនឹងបរិបទបច្ចុប្បន្ន ដោយសារព្រះរាជក្រឹត្យនេះ មានអាយុកាលជិត ២ទសវត្សរ៍មកហើយ តាំងពីឆ្នាំ២០០៥មក។ យ៉ាងណាមិញ លោករដ្ឋមន្ត្រី ក៏បានគាំទ្រ និងឯកភាពយ៉ាងខ្លាំង ដោយបញ្ជាក់ថា លោកនឹងចាត់មន្ត្រីជំនាញ ឱ្យសហការជាមួយលោកស្រីឧកញ៉ា កែវ មុំ ដើម្បីធ្វើការងារកែសម្រួលខ្លឹមសារមួយចំនួននៃព្រះរាជក្រឹត្យនេះ។
គួរបញ្ជាក់ថា ក្នុងជួបពិភាក្សាខាងលើ លោកស្រីឧកញ៉ា កែវ មុំ ក្នុងនាមប្រធានសភាមុខរបរ និងមីក្រូសហគ្រាសកម្ពុជា បានស្នើសុំរដ្ឋមន្ត្រីក្រសួងឧស្សាហកម្មចំនួន ៤ចំណុចដូចជា៖ ១)ស្នើសុំការគាំទ្រផ្នែកបច្ចេកទេសនៃការគ្រប់គ្រងគុណភាពស្តង់ដានៃគម្រោងបង្កើតមជ្ឈមណ្ឌលពាណិជ្ជកម្មកម្ពុជា ដែលនឹងក្លាយជាទីតាំងប្រមូលផ្តុំផលិតផលក្នុងស្រុករបស់ខ្មែរ ២)ស្នើមន្ត្រីជំនាញផ្នែកនីតិកម្ម នៃក្រសួងឧស្សាហកម្ម ជួយសហការកែសម្រួលព្រះរាជក្រឹត្យស្តីពីការបង្កើតសភាមុខរបរ និងមីក្រួសហគ្រាស ៣)ស្នើសុំឱ្យសភាមុខរបរ និងមីក្រូសហគ្រាស បានចូលរួមក្នុងក្រុមការងារ នៃវេទិការាជរដ្ឋាភិបាល ជាមួយវិស័យឯកជន និង ៤)ស្នើសុំឱ្យសភាមុខរបរ និងមីក្រូសហគ្រាស បង្កើតច្រកចេញចូលតែមួយ ដើម្បីឱ្យអ្នកធ្វើអាជីវកម្មខ្នាតតូច ងាយស្រួលក្នុងការចុះបញ្ជីអាជីវកម្មរបស់ខ្លួន៕
