សាលាអន្តរជាតិសៅប្រ៊ីដកម្ពុជា (Southbridge International School Cambodia) ដែលជាសាលានាំយកកម្មវិធីសិក្សាស្តង់ដារពិភពលោក ពីចក្រភពអង់គ្លេស ក្រោមការវិនិយោគពីស្ថាបនិក អ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប កំពុងពង្រីកខ្លួនសាខាទី២ នៅលើទឹកដីជ្រោយចង្វារ រាជធានីភ្នំពេញ។
សាលាអន្តរជាតិសៅប្រ៊ីដកម្ពុជា បានបើកដំណើរការជាផ្លូវការជាលើកដំបូង នៅថ្ងៃទី២៤ ខែមេសា ឆ្នាំ២០១៧ ស្ថិតនៅបុរីប៉េងហួត បឹងស្នោរ ខណ្ឌច្បារអំពៅ។ សាលានេះគឺជាការវិនិយោគរួមគ្នារវាងអ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប និងអ្នកឧកញ៉ា ថៃ ជាហួត ម្ចាស់ក្រុមហ៊ុន បុរី ប៉េង ហួត គ្រុប ក្រោមទុនវិនិយោគជំហ៊ានដំបូង ១២លានដុល្លារ នៅលើដីទំហំ ៤ហិកតា។
កាលពីពេលថ្មីៗនេះ នៅថ្ងៃទី៧ ខែមេសា ឆ្នាំ២០២៣ អ្នកឧកញ៉ា គិត ម៉េង បានប្រកាសកិច្ចព្រមព្រៀងអនុស្សរណៈយោគយល់គ្នា ជាមួយក្រុមហ៊ុន អ័រគីដេ ឌីវែឡុបម៉ិន ដែលមានលោកជំទាវ ហ៊ុន ម៉ាណា ជាប្រធានក្រុមប្រឹក្សាភិបាល ក្នុងការបង្កើតសាលារៀនអន្តរជាតិ South Bridge International School Cambodia (SISC) ថ្មីមួយទៀត លើទឹកដីទីក្រុងអ័រគីដេ ដឹប៊ូតានិច ស៉ីធី តាមបណ្តោយផ្លូវជាតិ ៦អា ខណ្ឌជ្រោយចង្វារ ដែលនឹងលេចចេញរូបរាងឡើង ក្នុងពេលឆាប់ៗខាងមុខនេះ។
សាលាអន្តរជាតិសៅប្រ៊ីដ ជាសាលាដែលមានបទពិសោធន៍អប់រំ និងមានសាខានៅប្រទេសជាច្រើន។ សាលាអន្តរជាតិសៅប្រ៊ីដ ផ្ដោតលើកម្មវិធីសិក្សាដែលទទួលស្គាល់ជាលក្ខណៈអន្ដរជាតិ ដែលបានទទួលអាជ្ញាប័ណ្ណពីចក្រភពអង់គ្លេស។ សម្រាប់សាលាអន្តរជាតិសៅប្រ៊ីដកម្ពុជា មានទទួលសិស្សានុសិស្សចាប់ពីកម្រិតមត្តេយ្យសិក្សា រហូតដល់ថ្នាក់ទី១២ ដែលតម្លៃសិក្សាត្រូវបានគេបង្ហើបឱ្យដឹងថា រាប់ពាន់ដុល្លារ ឬម៉ឺនដុល្លារ ក្នុងមួយឆ្នាំៗ៕
