សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ កាលពីរសៀលថ្ងៃទី៩ ខែតុលា ឆ្នាំ២០២៣ បានថ្លែងអំណរគុណដល់លោកឧកញ៉ា ហេង ឡុង ប្រធានសមាគមមិត្តសិល្បៈស្ម័គ្រចិត្តជួយសង្គម និងជាផលិតករក្នុងការដឹកនាំផលិតភាពយន្តចម្រៀង ដែលបានដឹកនាំផលិតភាពយន្តចម្រៀងទាក់ទងនឹងជីវិតពិតរបស់សម្តេច ចំនួន ២បទ។
ក្នុងឱកាសអញ្ជើញជាអធិបតីបិទ ការថតខ្សែភាពយន្ត «កូនប្រុសក្រោមពន្លឺព្រះចន្ទពេញបូណ៌មី» នៅ OCIC ជ្រោយចង្វារ សម្តេចតេជោ បានថ្លែងថា សម្តេចសូមអរគុណចំពោះឧកញ៉ា ហេង ឡុង ដែលដឹកនាំសម្តែងទាក់ទងនឹងការថតភាពយន្តចម្រៀងមួយផ្នែកទៀតគឺ «ទុក្ខស្រីប្តីព្រាត់» និង «ជីវិតក្មេងវត្ត» ហើយដែលពេលនេះក៏មានការចូលរួមចំនួន ៥០នាក់ ដែលមកទទួលមេដាយផងដែរ។
លោកឧកញ៉ា ហេង ឡុង បានបង្ហោះសារលើទំព័រហ្វេសប៊ុក នៅព្រឹកថ្ងៃទី១០ ខែតុលានេះ យ៉ាងដូច្នេះថា៖ ” ខ្ញុំបាទពិតជាមានកិត្តិយសដ៏ខ្ពង់ខ្ពស់ត្រូវបានសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បំពាក់មេដាយជាតូបការ ក្នុងពិធីបិទបញ្ចប់កញ្ចក់កាមេរ៉ា-ថតខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូណ៌មី» ដែលធ្វើឡើងនៅ មជ្ឈមណ្ឌលសន្និបាត និងពិពណ៌អន្តរជាតិជ្រោយចង្វារ រាជធានីភ្នំពេញ កាលពីរសៀលថ្ងៃទី៩ ខែតុលា ឆ្នាំ២០២៣”។
សូមជម្រាបថា ចម្រៀងភាពយន្តប្រវត្តិសាស្ត្រ «ជីវិតក្មេងវត្ត» ត្រូវបានដាក់សម្ពោធផ្សព្វផ្សាយជាសាធារណៈ កាលពីថ្ងៃទី២៨ ខែកញ្ញា ឆ្នាំ២០២២ ខណៈដែលចម្រៀងភាពយន្ត «ទុក្ខស្រីប្តីព្រាត់» បានធ្វើពិធីដាក់សម្ពោធបញ្ចាំងជាផ្លូវការ នៅថ្ងៃទី៧ ខែមករា ឆ្នាំ២០២៣។ ចម្រៀងភាពយន្តប្រវត្តិសាស្ត្រទាំង ២បទនេះ ផលិតដោយសមាគមសិល្បករខ្មែរ ដែលមានផលិតករ គឺលោកស្រី ចន ច័ន្ទលក្ខិណា, ឧកញ៉ា ហេង ឡុង និងឧកញ៉ា អ៉ឹង លីហេង, ដឹកនាំសម្តែងដោយ លោក ហ្វៃ សំអាង និងឧបត្ថម្ភសម្ភារៈ កាម៉េរាថតដោយអ្នកឧកញ៉ា ឡេង ណាវ៉ាត្រា ផងដែរ៕
