តំណាងសមាគមឧកញ៉ាកម្ពុជា ២រូប នឹងក្លាយជាសមាជិក នៃគណៈកម្មការអន្តរក្រសួងពិនិត្យនិងវាយតម្លៃលើសំណើសុំគោរមងារនិងការបញ្ចប់គោរមងារឧកញ៉ា។ នេះបើតាមព្រះរាជក្រឹត្យស្តីពីគោរមងារឧកញ៉ា ចុះថ្ងៃទី១១ ខែតុលា ឆ្នាំ២០២៣។
ព្រះរាជក្រឹត្យស្តីពីឧកញ៉ាថ្មីនេះ នៅត្រង់ជំពូកទី២ បានចែងអំពីស្ថាប័នមានសមត្ថកិច្ច ក្នុងនោះ មាត្រា៤ បានចែងថា ត្រូវបានបង្កើតគណៈកម្មការអន្តរក្រសួងពិនិត្យនិងវាយតម្លៃលើសំណើសុំគោរមងារនិងការបញ្ចប់គោរមងារឧកញ៉ា ដែលសរសេរជាអក្សរកាត់ថា គ.ព.វ.គ. មានសមត្ថកិច្ចពិនិត្យ វាយតម្លៃ និងលើកយោបល់ជូននាយករដ្ឋមន្ត្រីលើសំណើសុំផ្តល់និងបញ្ចប់គោរមងារឧកញ៉ា។
គ.ព.វ.គ. មានសមាសភាពដូចជា៖ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ជាប្រធាន, រដ្ឋលេខាធិការក្រសួងមហាផ្ទៃ ១រូប ជាអនុប្រធាន, រដ្ឋលេខាធិការទីស្តីការគណៈរដ្ឋមន្ត្រី ១រូប ជាអនុប្រធានប្រចាំការ និងមានសមាជិកដូចជា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ១រូប, រដ្ឋលេខាធិការក្រសួងយុត្តិធម៌ ១រូប, រដ្ឋលេខាធិការក្រសួងវប្បធម៌និងវិចិត្រសិល្បៈ ១រូប, រដ្ឋលេខាធិការក្រសួងធម្មការនិងសាសនា ១រូប, តំណាងសមាគមឧកញ៉ាកម្ពុជា ២រូប ព្រមទាំងមាន អគ្គនាយកនៃអគ្គនាយកដ្ឋានឥស្សរិយយសនិងគោរមងារ ជាលេខាធិការ។
ចំពោះសមាសភាព គណៈកម្មការអន្តរក្រសួងពិនិត្យនិងវាយតម្លៃលើសំណើសុំគោរមងារនិងការបញ្ចប់គោរមងារឧកញ៉ា ត្រូវតែងតាំងដោយសេចក្តីសម្រេចរបស់រាជរដ្ឋាភិបាល។ គណៈកម្មការនេះ មានអគ្គនាយកដ្ឋានឥស្សរិយយសនិងគោរមងារនៃទីស្តីការគណៈរដ្ឋមន្ត្រី ជាលេខាធិការដ្ឋាន ក្នុងការអនុវត្តសមត្ថកិច្ចរបស់ខ្លួន។
គោរមងារឧកញ៉ា សំដៅដល់ងារកិត្តិយស ដែលព្រះមហាក្សត្រទ្រង់ព្រះរាជទានដោយព្រះរាជក្រឹត្យទៅតាមលំដាប់ថ្នាក់ ដល់រូបវន្តបុគ្គលជាប្រជាពលរដ្ឋខ្មែរដែលមានគុណបំណាច់ក្នុងការចូលរួមអភិវឌ្ឍនិងកសាងជាតិ។ គោរមងារឧកញ៉ានៅកម្ពុជា មាន ៣លំដាប់ថ្នាក់គឺ លោកអ្នកឧកញ៉ា អ្នកឧកញ៉ា និងឧកញ៉ា៕
