លោកស្រីឧកញ៉ា ឆាយ ស៊ីវលីន ប្រធានសមាគមទេសចរណ៍កម្ពុជា និងជាអ្នកជំនាញលើវិស័យទេសចរណ៍មួយរូបយល់ថា ការរៀបចំពិធីបុណ្យអុំទូកទ្រង់ទ្រាយធំឡើងវិញនៅឆ្នាំ២០២៣នេះ ជារឿងវិជ្ជមានដល់វិស័យទេសចរណ៍នៅកម្ពុជា ព្រោះវាជាឱកាសសម្រាប់កម្ពុជាដើម្បីផ្សព្វផ្សាយ និងជាការឆ្លើយតបទៅនឹងព័ត៌មានអវិជ្ជមានទាំងឡាយអំពីកម្ពុជាផងដែរ។
លោកស្រី បានមានប្រសាសន៍ដូច្នេះថា៖
ជាមួយគ្នានេះ លោកស្រីឧកញ៉ា បានបញ្ជាក់ថា សម្រាប់សមាគមទេសចរណ៍កម្ពុជា នឹងចូលរួមជាមួយគណៈកម្មាធិការរៀបចំបុណ្យជាតិ ក្នុងការផ្សព្វផ្សាយអំពីការរៀបចំបុណ្យអុំទូកនេះឱ្យបានកាន់តែទូលំទូលាយ ទៅដល់ភ្ញៀវទេសចរជាតិ និងអន្តរជាតិ។
ប្រសាសន៍បន្ថែមរបស់លោកស្រីឧកញ៉ា៖
គួរបញ្ជាក់ថា រាជរដ្ឋាភិបាលកម្ពុជា បានប្រកាសថានឹងរៀបចំពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឱ្យគគ្រឹកគគ្រេងឡើងវិញ នៅក្នុងឆ្នាំ២០២៣នេះ ក្រោយខកខានរៀបចំទ្រង់ទ្រាយធំអស់រយៈពេល ៣ឆ្នាំជាប់ៗគ្នា ចាប់តាំងពីឆ្នាំ២០២០មក ដោយសារតែវិបត្តិជំងឺកូវីដ-១៩ និងការជាប់មមាញឹករៀបចំកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះ។
លោកស្រីឧកញ៉ា ឆាយ ស៊ីវលីន មានស្រុកកំណើតនៅក្រុងសៀមរាប ជាស្ថាបនិកក្រុមហ៊ុន CSL Group ដែលជាម្ចាស់ក្រុមហ៊ុនទេសចរណ៍ CSL Travel and Tours, ម្ចាស់សណ្ឋាគារ Kingdom Angkor, ម្ចាស់សណ្ឋាគារ Lynnaya Angkor Resort and Spa, ម្ចាស់ភោជនីយដ្ឋាន Palate Angkor និងជាប្រធានសមាគមទីភ្នាក់ងារទេសចរណ៍កម្ពុជា (CATA)៕
