កញ្ញា ឃួង ស៊ីណាម៉ាឡែន កូនស្រីលោក ឃួង ស្រេង អភិបាលរាជធានីភ្នំពេញ និងត្រូវជាអនាគតកូនប្រសាររបស់លោកឧកញ៉ា លីម ប៊ុណ្ណា បានបញ្ចប់ការសិក្សាថ្នាក់បរិញ្ញាបត្រដោយជោគជ័យ នៅប្រទេសអូស្ត្រាលី កាលពីថ្ងៃទី០៦ ខែវិច្ឆិកា ឆ្នាំ២០២៣។
លោក ឃួង ស្រេង បានលើកឡើងលើទំព័រហ្វេសប៊ុក កាលពីថ្ងៃចន្ទយ៉ាងដូច្នេះថា៖ “ឆ្នាំនេះកូនស្រីប៉ា ចម្រើនវ័យបាន ២០ឆ្នាំហើយ ហើយកូនក៏បានបញ្ចប់ថ្នាក់បរិញ្ញាបត្រដោយជោគជ័យ និងទទួលបានសញ្ញាបត្រក្នុងប្រទេសអូស្ត្រាលី នាថ្ងៃនេះផងដែរ។ ប៉ាម៉ាក់សូមចូលរួមអបអរកូនស្រី សូមកូនស្រីសម្លាញ់ជួបតែសំណាងល្អ ហើយខិតខំប្រឹងប្រែងសិក្សាបន្តយកសញ្ញាបត្រអនុបណ្ឌិត ដែលកូននឹងត្រូវបញ្ចប់នាឆ្នាំក្រោយនេះ”។
ពិធីទទួលសញ្ញាបត្ររបស់កញ្ញា ឃួង ស៊ីណាម៉ាឡែន នៅទឹកដីប្រទេសអូស្ត្រាលី ក៏មានការអញ្ជើញចូលរួមពីក្រុមគ្រួសាររបស់លោកឧកញ៉ា លីម ប៊ុណ្ណា ហៅឧកញ៉ាខ្នា អគ្គនាយកក្រុមហ៊ុន អិលប៊ីអិន គ្រុប (LBN Group) ផងដែរ ក្នុងនោះរួមមាន លោកស្រី ថុង ធីតា និងកូនប្រុសស្រី រួមទាំងកូនប្រសាររបស់លោកស្រី។
សូមជម្រាបថា កាលពីថ្ងៃទី២៧ ខែកក្កដា ឆ្នាំ២០២៣ លោក លីម ធារ៉ា កូនប្រុសរបស់លោកឧកញ៉ា លីម ប៊ុណ្ណា និងលោកស្រី ថុង ធីតា ក៏បានបញ្ចប់ការសិក្សានិងទទួលបានសញ្ញាបត្រថ្នាក់បរិញ្ញាបត្រ នៅសាកលវិទ្យាល័យ Nottingham Trent ប្រទេសអង់គ្លេស ហើយពេលនោះក៏មានវត្តមានកញ្ញា ឃួង ស៊ីណាម៉ាឡែន ចូលរួមអបអរសាទរដោយផ្ទាល់ផងដែរ៕
