អ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ គ្រុប បានបរិច្ចាគថវិកាបន្ថែមជាង ៨ម៉ឺនដុល្លារ ដើម្បីបង្គ្រប់ ៨៨៨៨៨ ដុល្លារ ប្រគល់ជូនមូលនិធិគន្ធបុប្ផាកម្ពុជា សម្រាប់គាំទ្រដំណើរការមន្ទីរពេទ្យគន្ធបុប្ជា កាលពីថ្ងៃទី៣១ ខែធ្នូ ឆ្នាំ២០២៣។
ក្រុមហ៊ុន លី ហួរ គ្រុប បានរៀបចំកម្មវិធីដើរម៉ារ៉ាតុន ក្រោមប្រធានបទ “ដំណើរទៅកាន់មនុស្សធម៌” នៅទីតាំងបរិវេណជុំវិញ បុរី វិមានភ្នំពេញ ស្ថិតនៅភូមិខ១ សង្កាត់ច្រាំងចម្រេះទី២ ខណ្ឌឬស្សីកែវ រាជធានីភ្នំពេញ រយៈចម្ងាយ ៥គីឡូម៉ែត្រ កាលពីថ្ងៃអាទិត្យ ដោយមានការចូលរួមពីលោក កើត ឆែ អភិបាលរងរាជធានីភ្នំពេញ អ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ គ្រុប ព្រមទាំងក្រុមគ្រួសារ និងសាធារណៈជនសរុបប្រមាណជិត ១០០០នាក់។
បន្ទាប់ពីកម្មវិធីដើរម៉ារ៉ាតុនទៅដល់គោលដៅ អ្នកឧកញ៉ា លី ហួរ បានប្រកាសជាសាធារណៈនូវថវិកា ដែលប្រមូលបានមានចំនួន ៨.៥២៧,៦៦ ដុល្លារ ហើយអ្នកឧកញ៉ា មានប្រសាសន៍ថា ក្រុមហ៊ុន លី ហួរ គ្រុប នឹងបរិច្ចាគថវិកាបន្ថែមចំនួន ៨០.៣៦០,៣៤ ដុល្លារ ដើម្បីបង្រ្គប់ចំនួន ៨៨.៨៨៨ ដុល្លារ។ ថវិកានេះ អ្នកឧកញ៉ានឹងយកទៅប្រគល់ជូន មូលនិធិគន្ធបុប្ជាកម្ពុជា សម្រាប់គាំទ្រដំណើរការមន្ទីរពេទ្យគន្ធបុប្ជា។
គួរបញ្ជាក់ថា កម្មវិធី “ដំណើរទៅកាន់មនុស្សធម៌” នេះ ធ្វើឡើងរួមគ្នាដើរ ដើម្បីសុខភាព និងគាំទ្រសកម្មភាពសប្បុរសធម៌ និងដើម្បីចូលរួមលើកកម្ពស់សុខភាព មិត្តភាព និងស្នាមញញឹមកុមារ ដើរជាមួយគ្នាបានគ្រប់វ័យ ជាលក្ខណៈគ្រួសារ ឬជាក្រុម។ ចំពោះថវិកាដែលទទួលបានពីការបរិច្ចាគ នឹងប្រគល់ជូនទៅកាន់មូលនិធិគន្ធបុប្ផាកម្ពុជា៕
