ឧកញ៉ាបណ្ឌិត សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន SAM SN REALTY បានបង្ហើបឱ្យដឹងថា ចាប់ពីឆ្នាំ២០១៩ រហូតដល់បំណាច់ឆ្នាំ២០២៣ ក្រុមហ៊ុនអចលនទ្រព្យមួយរបស់លោក បានខាតអស់ប្រាក់ជាង ១លានដុល្លារអាមេរិក ប៉ុន្តែលោកនៅតែបន្តទិញអចលនទ្រព្យនៅជាយក្រុងទុកដដែល។
អ្នកជំនាញអចលនវត្ថុនៅកម្ពុជារូបនេះ បានលើកឡើងលើទំព័រហ្វេសប៊ុករបស់ខ្លួន កាលពីពេលថ្មីៗនេះថា ពីឆ្នាំ២០១៩ រហូតដល់បំណាច់ឆ្នាំ២០២៣នេះ ក្រុមហ៊ុនអចលនទ្រព្យរបស់លោកតែមួយ ខាតអស់លុយ ១,១លានដុល្លារ តែបានចំណេញថ្ពាល់ និងក្បាលពោះយ៉ាងធំ។ ក្រៅពីនេះចំណាយផ្សេងៗ សម្រាប់ការរស់នៅទាំងគ្រួសារអស់ប្រហែល ១,៥លានដុល្លារ ដែលសរុបទឹកប្រាក់អស់ប្រមាណជា ២,៦លានដុល្លារ។
លោកឧកញ៉ាបណ្ឌិត បានបន្តថា តែបងប្អូនសង្កេតឃើញលោកនៅតែបន្តទិញអចលទ្រព្យជាយក្រុងទុកដដែល នេះក៏ព្រោះតែលោកធ្លាប់បានផលចំណេញដីជាងក្រុង ពីការវិនិយោគ ៩ឆ្នាំមុន ដោយលក់ចេញដីដែលបានទិញកាលពីឆ្នាំ២០១៤ ហើយលក់ក្នុងដើមឆ្នាំ២០១៩។ មានអ្នកវិនិយោគជាច្រើនណាស់ ដែលកំពុងបន្តទិញដដែល នោះបណ្តាលមកពីគាត់ទាំងនោះភាគច្រើនធ្លាប់បានចំណេញយ៉ាងច្រើនពីអចលនទ្រព្យ។
សម្រាប់លោកឧកញ៉ាផ្ទាល់ នៅតែមានទស្សនៈយល់ឃើញថា អ្នកវិនិយោគអចលនទ្រព្យនៅពេលនេះ នឹងទទួលបានផលចំណេញជាទីគាប់ចិត្តនៅពេលមិនលើសពីរយៈពេល៧ឆ្នាំក្រោយ។ លោកឧកញ៉ាបណ្ឌិត សំ សុខនឿន ក៏ធ្លាប់លើកឡើងផងដែរថា ជាទូទៅវិស័យអចលនទ្រព្យតែងរីកលូតលាស់ឡើងវិញ បន្ទាប់ពីមានការថមថយ ហើយសម្រាប់អ្នកដែលស៊ូទ្រាំក្នុងវិស័យនេះ នឹងទទួលបានផលចំណេញជាទីគាប់ចិត្តវិញមិនខាន នាពេលអនាគត៕
