អ្នកឧកញ៉ាបណ្ឌិត សុខ គង់ ប្រធានក្រុមហ៊ុន សូគីម៉ិច អ៊ិនវេសមេន គ្រុប និងក្រុមគ្រួសារ បានរៀបចំពិធីចែកអំណោយជាថវិកា និងអង្ករមួយចំនួន ជូនដល់លោកយាយ លោកតា កុមារា កុមារី ជនពិការ កងកម្លាំងសន្តិសុខ និងប្រជាជនក្រីក្រ សរុបប្រមាណ ៥០០០នាក់ នៅគេហដ្ឋានរបស់លោក នៅថ្ងៃពិធីសែនដកជើងធូប កាលពីថ្ងៃសៅរ៍ ទី០៣ ខែកុម្ភៈ។
តាមការឱ្យដឹងពីក្រុមហ៊ុន សូគីម៉ិច អ៊ិនវេសមេន គ្រុប បានបញ្ជាក់ថា មិនខុសពីឆ្នាំមុននោះទេ ជារៀងរាល់ឆ្នាំ នៅថ្ងៃពិធីសែនដកជើងធូប ឬជនជាតិចិន ហៅថា ពិធីជូនទេវតាឡើងឋានសួគ៌ អ្នកឧកញ៉ាបណ្ឌិត សុខ គង់ ប្រធានក្រុមហ៊ុន និងក្រុមគ្រួសារ តែងតែរៀបចំពិធីចែកអំណោយនៅគេហដ្ឋានរបស់លោក។ ជាក់ស្តែងឆ្នាំនេះ មានប្រជាជនប្រមាណជា ៥០០០នាក់ បានទទួលអំណោយសប្បុរធម៍នេះ។ ជាមួយគ្នានេះ ក្រុមហ៊ុនក៏សូមអរគុណសន្តិភាព និងរាជរដ្ឋាភិបាលកម្ពុជា ដែលបានផ្តល់ភាពសុខដុមរមនា និងការរស់នៅ រកទទួលទានដោយសុខសាន្តដូចសព្វថ្ងៃនេះ។
ពិធីចែកអំណោយនេះ ក៏មានការអញ្ជើញចូលរួមពីកូនស្រីរបស់អ្នកឧកញ៉ា សុខ គង់ ដូចជា លោកស្រីឧកញ៉ា សុខ ចន្ថា, លោកស្រីឧកញ៉ា សុខ ចន្ធី, លោកស្រីឧកញ៉ា សុខ ចន្ធូ និងស្វាមីរបស់លោកស្រី គឺលោកឧត្តមសេនីយ៍ឯកបណ្ឌិត ងិន បាណាល់ ផងដែរ។
អ្នកឧកញ៉ា សុខ គង់ ធ្លាប់បានថ្លែងក្នុងពិធីសម្ពោធសៀវភៅ «អាថ៌កំបាំងពីក្រោយភាពជោគជ័យរបស់អ្នកឧកញ៉ាបណ្ឌិត សុខ គង់» កាលពីថ្ងៃទី០៣ ខែមករា ឆ្នាំ២០២៣ ថាកើតមកជាមនុស្ស គ្មានអ្វីលំបាកជាងរស់នៅក្នុងស្ថានភាពក្រីក្រតោកយ៉ាកនោះទេ។ ដូច្នេះដើម្បីឆ្លងផុតពីជីវិតក្រីក្រ លោកបានណែនាំដល់មនុស្សគ្រប់គ្នាត្រូវតែចេះគិតគូ ប្រឹងប្រែងធ្វើការ ចេះសន្សំសំចៃប្រាក់កាស និងចេះចាយលុយឱ្យចំគោលដៅ តែក៏មិនត្រូវកំណាញ់ពេកនោះដែរ ដោយចេះចែករំលែកដាក់ទានដល់អ្នកក្រខ្សត់ ឬខ្វះខាតផង៕
