ឧកញ៉ា សំ សុខនឿន ប្រធានក្រុមហ៊ុន SAM SN Realty និងជាអ្នកជំនាញអចលនទ្រព្យមួយរូបនៅកម្ពុជា យល់ឃើញថា មកដល់ឆ្នាំ២០២៤នេះ វិស័យដីឡូត៍នៅកម្ពុជា មិនសូវមានតម្រូវការទៀតនោះទេ រីឯការទិញដីឡូត៍ដើម្បីបានផលចំណេញ ក៏មិនអាចចំណេញនោះដែរ ឬអាចត្រូវការរយៈពេលយូរណាស់ ទើបអាចចំណេញ។
ក្នុងបទសម្ភាសន៍ជាមួយសារព័ត៌មាន Oknha News កាលពីថ្ងៃទី១៥ ខែកុម្ភៈ លោកឧកញ៉ា សំ សុខនឿន បានលើកឡើងថា នៅពេលបច្ចុប្បន្ន ដីឡូត៍មានច្រើនមែនទែន គ្រប់កន្លែងទាំងអស់ជុំវិញរាជធានីភ្នំពេញ តាមបណ្តាខេត្ត ហើយសូម្បីនៅតាមជនបទមួយចំនួន ក៏មានដីឡូត៍លក់ដែរ។ សម្រាប់លោក ដីឡូត៍គឺជាការអភិវឌ្ឍមួយ សម្រាប់ជួយប្រជាពលរដ្ឋ ដែលមិនទាន់មានលំនៅឋាន អាចឱ្យគាត់មានដីជាកម្មសិទ្ធិរបស់ខ្លួន និងអាចអភិវឌ្ឍលំនៅឋាន ប៉ុន្តែអ្វីដែលយើងសង្កេតមើលឃើញមកដល់ពេលនេះ គឺការអភិវឌ្ឍដីឡូត៍ បានបង្ករភាពលំបាកយ៉ាងច្រើនដល់រាជរដ្ឋាភិបាល ក៏ដូចជាបងប្អូនប្រជាពលរដ្ឋដែលបានទិញដីឡូត៍ហើយ តែមិនទទួលបានដីឡូត៍, បានវិនិយោគហើយ តែមិនទាន់បានផលចំណេញ, បាននិងកំពុងដាក់ទុនវិនិយោគលើគម្រោងអភិវឌ្ឍន៍ដីឡូត៍មួយចំនួនសង្ឃឹមថាបានការប្រាក់ តែមិនទទួលបានប្រាក់ ហើយកត្តាទាំងអស់នេះបានជះឥទ្ធិពលជាអវិជ្ជមានដល់វិស័យដីឡូត៍ ដែលធ្វើឱ្យវិស័យដីឡូត៍នាពេលបច្ចុប្បន្ន មានដីឡូត៍លក់ តែមិនមានអ្នកទិញ។
លោកឧកញ៉ា បានបន្តថា សម្រាប់លោកយល់ឃើញថា ចាប់ពីពេលនេះតទៅ ដីឡូត៍នឹងមិនសូវមានតម្រូវការទេ ប៉ុន្តែតំបន់មួយចំនួនអាចនៅមានតម្រូវការដដែល។ ឧទាហរណ៍ បើសិនជាមានតំបន់សេដ្ឋកិច្ចពិសេសមួយ នៅតំបន់ណាមួយថ្មី ដូច្នេះបងប្អូនប្រជាពលរដ្ឋដែលទៅតំបន់នោះប្រាកដជាត្រូវការដីឡូត៍។ ដីឡូត៍នៅតែមានតម្រូវការខ្លះៗ ជាពិសេសដែលចាំបាច់នៅក្នុងតំបន់ណាមួយតែម្តង។
ជាយោបល់របស់លោក កម្ពុជានៅពេលនេះ គឺនឹងមិនមានតម្រូវការដីឡូត៍តទៅទៀតទេ។ នេះមិនមែនជាការវាយប្រហារចំពោះអ្នកអភិវឌ្ឍដីឡូត៍នោះទេ ប៉ុន្តែលោកសូមប្រៀបធៀបថា ដូចបងប្អូនប្រជាពលរដ្ឋយើងពីមុនធ្លាប់ប្រើទូរស័ព្ទដៃ Nokia N ចុចពិល ប៉ុន្តែបងប្អូនពេលនេះប្រើ iPhone, Samsung ឬបច្ចេកវិទ្យាទំនើបៗអស់ហើយ។ លោកចង់បញ្ជាក់ថា ប្រជាពលរដ្ឋយើង មានតម្រូវការលំនៅឋានជាផ្ទះវិញតែម្តង មានន័យថាយើងលែងត្រូវការដីឡូត៍ច្រើនដូចមុនទៀតហើយ ព្រោះថាបើគាត់ទិញដី គឺអត់មានផ្ទះដដែល ដូច្នេះពួកគាត់ត្រូវការផ្ទះតែម្តង ឬលំនៅឋានសមរម្យ ដែលជាតម្រូវការពិតប្រាកដ។
លោកឧកញ៉ា សំ សុខនឿន បានឱ្យដឹងផងដែរថា រាជរដ្ឋាភិបាលកម្ពុជាក៏កំពុងតែរៀបចំការសហការជាមួយក្រុមហ៊ុនឯកជនមួយចំនួន ដើម្បីអភិវឌ្ឍលំនៅឋានតម្លៃសមរម្យ លក់ជូនដល់ប្រជាពលរដ្ឋរបស់យើង។ ជារួម លោកយល់ថា វិស័យដីឡូត៍នឹងមានភាពលំបាកជាងមុន ប្រៀបធៀបទៅនឹង ៥ឆ្នាំមុន។ ចំពោះផលចំណេញវិញ មកដល់ពេលនេះសម្រាប់បងប្អូនដែលបានទិញដីឡូត៍ហើយ មិនទាន់ទទួលបានផលចំណេញខ្ពស់នៅឡើយទេ ពីព្រោះតែដីឡូត៍ត្រូវការពេលវេលា ដើម្បីរីកចម្រើន។ អ្នកអភិវឌ្ឍដីឡូត៍ គាត់ទិញដីឡូត៍មួយការ៉េ ៥ឬ៦ដុល្លារ នៅពេលពុះលក់ឡើងដល់មួយការ៉េជិត ១០០ដុល្លារ ដូច្នេះសួរថា តើប្រជាពលរដ្ឋទិញហើយលក់ភ្លាមចំណេញដែរទេ គឺប្រាកដណាស់ មិនទាន់អាចចំណេញទេ ឬអាចត្រូវការពេលវេលាយូរណាស់ ទើបទទួលបានផលចំណេញ៕
