លោក ខេមរៈ ភារុណ បងប្រុសបង្កើតរបស់ឧកញ៉ា ខេមរៈ សិរីមន្ត និងជាអ្នកនិពន្ធចម្រៀងដ៏ល្បីមួយរូបនៅកម្ពុជា ទទួលបានបរិញ្ញាបត្រជាន់ខ្ពស់ (ថ្នាក់អនុបណ្ឌិត) ជំនាញរដ្ឋបាលសាធារណៈ ពីសាកលវិទ្យាល័យជាតិគ្រប់គ្រង ជាផ្លូវការ កាលពីថ្ងៃទី១៥ ខែកុម្ភៈ ឆ្នាំ២០២៤។ នេះបើតាមទំព័រហ្វេកប៊ុកផ្លូវការរបស់លោកឧកញ៉ា ខេមរៈ សិរីមន្ត។
លោកឧកញ៉ា ខេមរៈ សិរីមន្ត បានសរសេរយ៉ាងខ្លីប្រកបដោយអត្ថន័យក្នុងបណ្តាញសង្គមរបស់លោក កាលពីថ្ងៃទី១៩ ខែកុម្ភៈ ថា៖ «ប្អូនដឹងថាបងហត់ណាស់ បងខំរៀនបណ្តើរហើយនៅខំឆ្លៀតពេលទំនេរនិពន្ធចម្រៀងឱ្យប្អូនបណ្តើរ ទើបប្អូនបានល្បីល្បាញ ២០ឆ្នាំមកនេះ»។ លោកឧកញ៉ា បានបន្តថា «ពេលខ្លះបងទៅរៀននៅក្រៅប្រទេស ហើយនៅឈ្លៀតនិពន្ធផ្ញើចម្រៀងតាមតេឡេក្រាមមកឱ្យប្អូនទៀតព្រោះស្រលាញ់ប្អូន។ អរគុណ បងប្រុសដ៏ល្អរបស់ប្អូន»។
លោក ខេមរៈ ភារុណ ក៏បានបង្ហោះសារដ៏មានអត្ថន័យលើទំព័រហ្វេសប៊ុករបស់ខ្លួនផងដែរ ដោយលោកបានលើកឡើងថា ពេលវេលាដ៏យូរ លោកបានកំណត់ថា នៅពេលលោកអាយុជាងសែទើបលោករៀនបន្តយកអនុបណ្ឌិត ឬបណ្ឌិត អរគុណពេលវេលាដែលឱ្យលោកមានថ្ងៃនេះ អរគុណសន្តិភាព។ លោកក៏សូមអរគុណប្រពន្ធសម្លាញ់របស់លោក ដែលបានលះបង់ពេលវេលាគ្រប់យ៉ាង ទើបលោកបានសម្រេចការសិក្សាដោយជោគជ័យ ទទួលសញ្ញាបត្របរិញ្ញាបត្រជាន់ខ្ពស់មួយនេះ។
គួរបញ្ជាក់ថា លោក ខេមរៈ ភារុណ បានទទួលសញ្ញាបត្របរិញ្ញាបត្រជាន់ខ្ពស់ ក្នុងពិធីប្រគល់សញ្ញាបត្រដល់និស្សិតជ័យលាភី នៃសាកលវិទ្យាល័យជាតិគ្រប់គ្រងចំនួនជាង ៥ពាន់អង្គ/នាក់ និងពិធីសម្ពោធដាក់ឱ្យប្រើប្រាស់ជាផ្លូវការសាកលវិទ្យាល័យជាតិគ្រប់គ្រង-សាខាវាលស្បូវ ក្នុងសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់សម្ដេចមហាធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីព្រឹកថ្ងៃទី១៥ ខែកុម្ភៈ ឆ្នាំ២០២៤៕
