ស្ពានអាកាស មរតកតេជោ របស់អ្នកឧកញ៉ា ពុង ឃាវសែ នឹងដាក់ឱ្យប្រជាពលរដ្ឋធ្វើដំណើរបណ្ដោះអាសន្ន នៅដើមខែក្រោយ

ស្ពានអាកាស មរតកតេជោ ជាន់ទី២ ដំណាក់កាលទី១ ដែលតភ្ជាប់ចរាចររវាងមហាវិថី សម្តេចតេជោ ហ៊ុន សែន និងមហាវិថីព្រះមុនីវង្ស នឹងដាក់ឱ្យប្រជាពលរដ្ឋធ្វើដំណើរជាបណ្ដោះអាសន្ន នៅដើមខែក្រោយនេះហើយ។ នេះបើយោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ នាល្ងាចថ្ងៃទី២៨ ខែមីនា ឆ្នាំ២០២៤។

តាមសេចក្ដីជូនដំណឹងនេះបញ្ជាក់ថា ការសាងសង់ស្ពានអាកាស “មរតកតេជោ” ជាន់ទី២ ដំណាក់កាលទី១ បានសម្រេចស្ទើរទាំងស្រុងហើយ ដោយនឹងបញ្ចប់ការដ្ឋាន នៅថ្ងៃទី៣០ ខែមីនា ឆ្នាំ២០២៤។ ដើម្បីជួយសម្រួលដល់លំហូរចរាចរ និងការធ្វើដំណើររបស់ប្រជាពលរដ្ឋ នាឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់ក្នុងពេលឆាប់ៗខាងមុខ ក៏ដូចជួយដោះស្រាយការកកស្ទះចរាចរបានមួយកម្រិត ត្រង់ចំណុចប្រសព្វមហាវិថីទាំងបី។ ស្ពានអាកាសនេះ នឹងបើកឱ្យធ្វើដំណើរឆ្លងកាត់ជាបណ្ដោះអាសន្ន ចាប់ពីថ្ងៃទី១ ខែមេសា តទៅ។

សូមជម្រាបជូនថា ស្ពានអាកាស « មរតកតេជោ» ស្ថិតក្នុងមូលដ្ឋានខណ្ឌមានជ័យ និងខណ្ឌចំការមន រាជធានីភ្នំពេញ ស្ថាបនាដោយក្រុមហ៊ុនវិនិយោគទុនអាណិកជនកម្ពុជា OCIC របស់អ្នកឧកញ៉ា ពុង ឃាវសែ គ្រោងចំណាយថវិកាជាង ៣៦លានដុល្លារ និងចំណាយពេលវេលាសាងសង់ ៣៦ខែ៕