អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា កាលពីរសៀលថ្ងៃទី០២ ខែមេសា ឆ្នាំ២០២៤ បានដឹកនាំអនុប្រធាន និងសមាជិកនៃសមាគមអ្នកអភិវឌ្ឍន៍លំនៅឋានកម្ពុជា ដែលភាគច្រើនជា អ្នកឧកញ៉ា ឧកញ៉ា ម្ចាស់បុរីធំៗនៅក្នុងប្រទេសកម្ពុជា ក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់សមាគមអ្នកអភិវឌ្ឍន៍លំនៅឋានកម្ពុជា ក្រោមអធិបតីភាពលោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។
ពិធីសន្និបាតប្រចាំឆ្នាំខាងលើនេះ ធ្វើឡើងនៅបុរី ប៉េង ហួត បឹងស្នោ របស់អ្នកឧកញ៉ា ថៃ ជាហួត អនុប្រធានសមាគមអ្នកអភិវឌ្ឍន៍លំនៅឋានកម្ពុជា ដោយមានការចូលរួមពីថ្នាក់ដឹកនាំក្រសួងរៀបចំដែនដី និងសមាជិក-សមាជិកាសមាគម ព្រមទាំងភ្ញៀវកិត្តិយសជាច្រើននាក់ទៀត។
កម្មវិធីសន្និបាតនេះ រៀបចំឡើងមានគោលបំណងដើម្បីពិនិត្យពីសកម្មភាព និងវឌ្ឍនភាពការងាររបស់សមាគម ដែលសម្រេចលទ្ធផលបាននៅឆ្នាំ២០២៣ និងរៀបចំផែនការការងារសម្រាប់ឆ្នាំ២០២៤។ ជាពិសេសគឺ ការពិភាក្សាអំពីផលប៉ះពាល់ និងបញ្ហាមួយចំនួនលើវិស័យអចលនទ្រព្យ និងវិស័យសំណង់ ដូចជាបញ្ហាវិបត្តិសេដ្ឋកិច្ច និងបញ្ហាសកលនៃសង្គ្រាមនៅបណ្តាប្រទេសមួយចំនួន។
អ្នកឧកញ៉ា លី ហួរ បានលើកឡើងថា បញ្ហាសេដ្ឋកិច្ចធ្លាក់ចុះជាសកល បានជះឥទ្ធិពលយ៉ាងខ្លាំងដល់សេដ្ឋកិច្ចកម្ពុជាទាំងមូល ជាពិសេសលើវិស័យអចលនទ្រព្យ ខណៈដែលបច្ចុប្បន្ននេះ គម្រោងបុរី និងខុនដូ ការលក់មានការធ្លាក់ចុះយ៉ាងខ្លាំង។ អ្នកឧកញ៉ាប្រធានសមាគម បានបន្ថែមដូច្នេះថា៖ “ជាក់ស្តែង អតិថិជនពន្យាពេលបង់ប្រាក់ រហូតដល់អតិថិជនមួយចំនួនមិនមានលទ្ធភាព មិនបានបង់ប្រាក់ត្រឡប់មកក្រុមហ៊ុនវិញ ព្រមទាំងទាមទារឱ្យក្រុមហ៊ុនទិញផ្ទះត្រឡប់មកវិញ ធនាគារពាណិជ្ជក៏បានតម្លើងអត្រាការប្រាក់ និងរឹតបន្តឹងការផ្ដល់ឥណទានលំនៅឋានជូនអតិថិជន ផ្អាកផ្តល់ឥណទានលើការវិនិយោគលើវិស័យសំណង់ ក្រសួងស្ថានប័នរដ្ឋ ដែលពាក់ព័ន្ធមានការយឺតយ៉ាវក្នុងការផ្តល់សេវាកម្ម រឹតបន្តឹងលើការអនុវត្តផ្លូវច្បាប់ និងមានការផាកពិន័យជាប្រាក់ដល់ក្រុមហ៊ុនអភិវឌ្ឍន៍ផងដែរ ធ្វើឱ្យក្រុមហ៊ុនមួយចំនួនមានវិបត្តិហិរញ្ញវត្ថុយ៉ាងធ្ងន់ធ្ងរ ក្រុមហ៊ុនមួយចំនួនផ្អាកការសាងសង់ បិទគម្រោងទាំងមូល និងឈានទៅដល់ក្ស័យធនតែម្ដង”។
ឆ្លើយតបនឹងបញ្ហាខាងលើ ឧបនាយករដ្ឋមន្ដ្រី សាយ សំអាល់ ក្នុងនាមជាប្រធានស្ថាប័នដែលជាអាណាព្យាបាល បានថ្លែងថា កង្វល់របស់សមាគម ក៏ជាកង្វល់របស់ក្រសួងដូចគ្នា ដូច្នេះក្រសួងនិងសមាគមយកឱកាសនេះ ដើម្បីស្វែងរកយុទ្ធសាស្ដ្ររួម សម្រាប់ដើរទៅមុខទាំងអស់គ្នា ដោយពួតដៃគ្នាឈរលើវិថីមួយដ៏ត្រឹមត្រូវ ដើម្បីកុំឱ្យមានការលំបាកទៅថ្ងៃខាងមុខទៀត ពិសេសការខាតបង់ទាំងពេលវេលា និងថវិកា។
គួររំឭកថា កាលថ្ងៃ២៣ ខែតុលា ឆ្នាំ២០២៣ អ្នកឧកញ៉ា លី ហួរ បានដឹកនាំប្រតិភូសមាគមអ្នកអភិវឌ្ឍន៍លំនៅឋានកម្ពុជា ចូលជួបប្រជុំជាមួយ ឧបនាយករដ្ឋមន្ត្រី សាយ សំអាល់ នៅទីស្តីការក្រសួងរៀបចំដែនដី និងបានលើកសំណើសុំដល់រាជរដ្ឋាភិបាល ឱ្យជួយដោះស្រាយបញ្ហាប្រឈមមួយចំនួន ដើម្បីជួយសង្គ្រោះវិស័យសំណង់ និងវិស័យអចលនទ្រព្យឱ្យងើបឡើងវិញ៕
