កាលថ្ងៃទី២ ខែមេសា ឆ្នាំ២០២៤ ក្រុមហ៊ុន ធី ធី ភី គ្រុប ខូអិលធីឌី (TTP Group Co., Ltd.) តំណាងដោយឧកញ៉ា តែ ប៉រហុង អនុប្រធានក្រុមហ៊ុន និងក្រុមហ៊ុន ហ៊ីការី ជី ដូសា (HIKARI JIDOSHA) បានសហការជាមួយវិទ្យាស្ថានបច្ចេកទេស ហ្ស៊ី វ៉េ សេ (JVC) រៀបចំពិធីសម្ពោធដាក់ឱ្យដំណើរការរោងជាងជួសជុលរថយន្ត ហ្ស៊ី វ៉េ សេ ដែលបានកែលម្អថ្មី ប្រព្រឹត្តនៅវិទ្យាស្ថានបច្ចេកទេស ហ្ស៊ី វ៉េ សេ ក្រោមអធិបតីភាពលោក អ៊ូអ៊ីណូ អាត់ ស៊ូស៊ី (UENO ATSUSHI) ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងលោក ប៉ុក ប៉ាន់ រដ្ឋលេខាធិការ នៃក្រសួងការងារ និងបណ្តុះបណ្តាលវិជ្ជាជីវៈ។
គម្រោងនេះ គឺធ្វើឡើងដើម្បីជួយគាំទ្រលើការអនុវត្តកម្មវិធីសិក្សា កម្រិតសញ្ញាបត្រជាន់ខ្ពស់បច្ចេកទេស ជំនាញជួសជុលនិងថែទាំរថយន្ត ដែលមានរយះពេល២ឆ្នាំ។ ហើយជាពិសេស កម្មវិធីបណ្តុះបណ្តាលកម្រិតសញ្ញាបត្រជាន់ខ្ពស់បច្ចេកទេសនេះបង្កើតឡើងក្នុងគោលបំណង ជួយគាំទ្រដល់ប្រជាជនកម្ពុជា ក្នុងការបង្កើនធនធាន និងកម្លាំងពលកម្មដែលមានជំនាញបច្ចេកទេសច្បាស់លាស់ តាមបែបស្តង់ដារអន្តរជាតិ។
លោកឧកញ៉ា តែ ប៉រហុង អនុប្រធានក្រុមហ៊ុន TTP GROUP Co., Ltd. មានសេចក្តីសោមនស្សរីករាយជាខ្លាំង ដែលបានចូលរួមជាចំណែកមួយ គាំទ្រដល់ប្រជាជនកម្ពុជា ក្នុងការបង្កើនធនធាន និងកម្លាំងពលកម្មដែលមានជំនាញបច្ចេកទេសច្បាស់លាស់ តាមរយៈកិច្ចសហប្រតិបត្តិការ ជាមួយក្រសួងការងារ និងបណ្តុះបណ្តាលវិជ្ជាជីវៈ និងដៃគូសហការពីប្រទេសជប៉ុន លើគម្រោងដែលផ្តល់ជូនសិស្សក្រីក្រ១លាន៥សែននាក់សិក្សា “ជំនាញ” បច្ចេកទេស និងវិជ្ជាជីវៈ ក្រោមការផ្តួចផ្តើម និងប្រកាសដាក់អនុវត្តឲ្យប្រើប្រាស់ជាផ្លូវការដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។
លោកឧកញ៉ា តែ ប៉រហុង សង្ឃឹមយ៉ាងម៉ុតមាំថា គម្រោងនេះ នឹងក្លាយជាផ្នែកមួយ នៃការអភិវឌ្ឍន៍ធនធានមនុស្ស បង្កើនអត្រាកម្មភាពនិងសហគ្រិនភាព លើជំនាញជួសជុលនិងថែទាំរថយន្តនៅកម្ពុជា ក្នុងបរិបទសកលភាវូបនីយ៍កម្ម ប្រទេសមានការរីកចម្រើន លូតលាស់ឥតឈប់ឈរ និងមានការប្រកួតប្រជែង ដើម្បីស្វែងរកឧត្តមភាព គុណភាពផលិតផល និងសេវាកម្មឱ្យមានកម្រិតអប្បបរមា ជាពិសេសការកសាងកម្លាំងពលកម្មឱ្យមានសមត្ថភាព និងលទ្ធភាពប្រើប្រាស់បច្ចេកទេសគ្រប់កម្រិត ដើម្បីឈានទៅ សម្រេចគោលដៅ កំណើនសេដ្ឋកិច្ច និងស្ថិរភាពសង្គម ប្រកបដោយចីរភាព៕
