អ្នកឧកញ៉ា សុខ គង់ ប្រធានក្រុមហ៊ុន សុខា អូតែល បានចូលក្រាបថ្វាយបង្គំ សម្តេចព្រះព្រហ្មរតនមុនី ពិន សែម សមាជិកថេរសភាពុទ្ធសាសនា នៃព្រះរាជាណាចក្រកម្ពុជា ដើម្បីពិភាក្សាអំពីពិបុណ្យមហាផ្កាប្រាក់សាមគ្គី កសាងព្រះពុទ្ធប្បដិមាកម្ពស់១០៨ម៉ែត្រ និងព្រះពុទ្ធប្បដិមាអង្គតូច ៨៤,០០០ អង្គនៅលើខ្នងភ្នំបូកគោ ដែលនឹងប្រារព្ធធ្វើឡើង នៅថ្ងៃទី២៨ ខែមិថុនា ឆ្នាំ២០២៤ រហូតដល់ ថ្ងៃទី៣០ ខែមិថុនា ឆ្នាំ២០២៤។ នេះបើតាមទំព័រហ្វេសប៊ុក ព្រះពុទ្ធប្បដិមាកម្ពស់១០៨ម៉ែត្រលើភ្នំបូកគោ នៅថ្ងៃទី៣០ ខែមេសា ឆ្នាំ២០២៤នេះ។
កាលថ្ងៃទី០១ ដល់ថ្ងៃទី០៣ ខែមីនា ឆ្នាំ២០២៤ សម្តេចព្រះសង្ឃនាយក សម្តេចព្រះសង្ឃនាយករង ព្រះមេគណរាជធានី ខេត្ត និងព្រះមន្រ្តីសង្ឃគ្រប់ឋានានុក្រម រួមជាមួយ អ្នកឧកញ៉ា សុខ គង់ និងក្រុមគ្រួសារ ព្រមទាំងពុទ្ធបរិស័ទជិតឆ្ងាយ ក្នុងនិងក្រៅប្រទេស ក៏បានមូលមតិគ្នាជាឯកច្ឆ័នផ្តើមធ្វើបុណ្យផ្ការស្មីសាមគ្គីជាតិដើម្បីកសាងព្រះពុទ្ធប្បដិមា កម្ពស់ ១០៨ម៉ែត្រ និងព្រះពុទ្ធប្បដិមាអង្គតូចចំនួន ៨៤,០០០ អង្គ នៅលើខ្នងភ្នំបូកគោ ក្នុងឧទ្យានជាតិព្រះមុនីវង្ស បូកគោ ខេត្តកំពត រយៈពេល ៣ថ្ងៃ រួចម្តងហើយផងដែរ។
គម្រោង សាងសង់ព្រះពុទ្ធប្បដិមាកម្ពស់ ១០៨ ម៉ែត្រ នៅលើខ្នងភ្នំបូកគោ ជាគំនិតផ្តួចផ្តើមរបស់អ្នកឧកញ៉ា សុខ គង់ ដែលមានចក្ខុវិស័យ និងសទ្ធាជ្រះថ្លាយ៉ាងមុតមាំក្នុងការកសាងព្រះពុទ្ធប្បដិមាដ៏ធំ និងខ្ពស់ជាងគេនៅក្នុងព្រះរាជាណាចក្រកម្ពុជា ហើយក៏នឹងស្ថិតក្នុងចំណោមព្រះពុទ្ធប្បដិមាខ្ពស់ៗនៅលើពិភពលោក។ គម្រោងសាងសង់ព្រះពុទ្ធប្បដិមានេះ ជាការរក្សានូវអត្តសញ្ញាណ និងសាសនាជាតិ ព្រោះព្រះពុទ្ធប្បដិមាទាំងនោះ នឹងគង់នៅជាសម្បត្តិវប្បធម៌ជាតិតជំនាន់ សម្រាប់ជាទីសក្ការ:ដ៏ឧដុង្គឧត្តមរបស់ពុទ្ធសាសនិកជនទាំងអស់គ្នា និងទុកជាស្នាដៃនៃកេរ្តិ៍មរតកដល់កូនចៅជំនាន់ក្រោយ។
តាមការបញ្ជាក់ពីក្រុមហ៊ុន សុខា អូតែល បានឱ្យដឹងថា នៅក្នុងគម្រោងទាំងមូល គឺមានផ្ទៃដីសរុបរហូតដល់ទៅ ៩១,៧ហិកតា ហើយនឹងមានគម្រោងបង្កើតនូវឧទ្យានផ្សេងៗជាច្រើន ដែលក្នុងឧទ្យាននីមួយៗសុទ្ធសឹងតែមានដំណែលរឿងទាក់ទងទៅនឹងព្រះពុទ្ធសាសនា និងពុទ្ធប្រវត្តិ។ បន្ថែមពីនេះ នៅលើផ្ទៃដីដ៏ធំ ក្រៅពីទេសភាពដែលអំណោយផលពីធម្មជាតិនៃឧទ្យានជាតិមុនីវង្យបូកគោ ក៏នឹងមានការដាំរុក្ខជាតិបន្ថែមជាច្រើនទៀត ដើម្បីបង្កើនសោភ័ណភាព និងភាពទាក់ទាញកាន់តែខ្លាំងផងដែរ។
គម្រោងសាងសង់ព្រះពុទ្ធប្បដិមាកម្ពស់ ១០៨ ម៉ែត្រ នៅលើខ្នងភ្នំបូកគោ ស្ថិតនៅក្នុងឧទ្យានជាតិព្រះមនុវង្ស «បូកគោ» ខេត្តកំពត ត្រូវបានបញ្ចុះបឋមសិលាបើកការដ្ឋានសាងសង់ជាផ្លូវការ ក្រោមអធិបតីភាព លោក ជា សុផារ៉ា កាលពីថ្ងៃទី០៤ ខែមករា ឆ្នាំ២០២៣។ អ្នកឧកញ៉ា សុខ គង់ ប្រធានក្រុមហ៊ុន សុខា អូតែល ធ្លាប់បានបញ្ជាក់ថា ព្រះពុទ្ធបដិមានេះ នឹងចំណាយរយៈពេលសាងសង់ ៤ឆ្នាំ និងចំណាយប្រាក់ចន្លោះពី ៣០លានដុល្លារ ទៅ៤០លានដុល្លារអាមេរិក៕
