លោកឧកញ៉ា ប៊ុន បារាំង ប្រធានសហគមន៍អ្នកផលិតអំបិលខេត្តកែប-កំពត រួមជាមួយ លោក លាង សំណាត់ ប្រធានសាលាដំបូងខេត្តកំពត និងលោក ជីវ ចាន់តារា ព្រះរាជអាជ្ញាអមសាលាដំបូងខេត្ត បានចុះសួរសុខទុក្ខ និងនាំយកអំណោយផ្ដល់ជូនមជ្ឈមណ្ឌលស្តានីតិសម្បទាព្យាបាល អ្នកញៀនគ្រឿងញៀន នៃកងពលតូចថ្មើជើង លេខ៣១ កាលពីថ្ងៃទី២៣ ខែឧសភា ឆ្នាំ២០២៤។
ក្នុងការចុះសួរសុខទុក្ខ និងនាំយកអំណោយផ្ដល់ជូនមជ្ឈមណ្ឌលស្តានីតិសម្បទាព្យាបាល អ្នកញៀនគ្រឿងញៀន នៃកងពលតូចថ្មើជើងលេខ៣១ មានការដឹកនាំបញ្ជាផ្ទាល់ដោយលោកឧត្តមសេនីយ៍ត្រី គឹម កុសល មេបញ្ជាការ រងកងពល និងជានាយកមជ្ឈមណ្ឌលព្យាបាល និងស្តារនីតិសម្បទាអ្នកញៀនគ្រឿងញៀន។
នៅក្នុងឱកាសនេះ ឧកញ៉ា ប៊ុន បារាំង បានកោតសរសើរ និងវាយតម្លៃនាយក នាយករង នាយទាហាន ពលទាហាន និងមន្ត្រីពាក់ព័ន្ធដែល បម្រើការក្នុងមជ្ឈមណ្ឌលព្រមទាំងជនរងគ្រោះទាំងអស់ ដែលបានគ្រប់គ្រង ដឹកនាំ និងសហការគ្នាបានល្អប្រសើរ មានការសាមគ្គីផ្ទៃក្នុង រវាងជួរថ្នាក់ដឹកនាំ និងមន្ត្រីក្រោមឱវាទ ពិសេសជន រង គ្រោះអ្នកញៀនថ្នាំញៀន ដែលកំពុងស្នាក់នៅក្នុងមជ្ឈមណ្ឌល។
លោកឧកញ៉ា ប៊ុន បារាំង ក៏បានផ្ដាំផ្ញើដល់ក្មួយៗ កូនៗ អ្នកញៀនគ្រឿងញៀននៅមជ្ឈមណ្ឌលនេះ ទោះបីពី មុន ក្មួយៗ កូនៗ ដើរផ្លូវខុស ដោយសារសេពគ្រឿងញៀន ដែលធ្វើឱ្យក្រុមគ្រួសារ ឪពុកម្ដាយ មានការខកចិត្ត ជាពិសេសសង្គមមានការស្អប់ខ្ពើម។ ដូច្នេះក្មួយៗ កូនៗ ដែលមានវាសនាស្នាក់នៅក្នុងមជ្ឈមណ្ឌលកែប្រែនេះ ក្រោមការខិតខំប្រឹងប្រែងរបស់អង្គភាព។ ពិសេសមជ្ឈមណ្ឌល ចូលរួមចំណែកជាមួយរាជរដ្ឋាភិបាល នឹងជួយ គាំទ្រកូន ក្មួយ អ្នកញៀនគ្រឿងញៀន លើកស្ទួយក្នុងការកសាងកែប្រែផ្តាច់ឱ្យអស់ ពាក់ព័ន្ធសារធាតុញៀន ឱ្យបានជាសះស្បើយទាំងអស់គ្នា នាពេលបច្ចុប្បន្ននេះ ក៏ដូរជាទៅអនាគតផងដែរ។
ទន្ទឹមនឹងនោះ ឧកញ៉ា ប៊ុន បារាំង ក៏បានផ្ដាំផ្ញើដល់ កូនក្មួយដែលកំពុងសម្រាកព្យាបាល ក្រោយពេលជា សះស្បើយ វិលត្រឡប់ទៅគេហដ្ឋានវិញ ឪពុកម្ដាយនឹងមានការត្រេកអរ ត្រូវរស់ជាទំពាំងសម្រាប់ស្នងឫស្ស៊ី។
សូមជម្រាបជូនថា មជ្ឈមណ្ឌលស្ដារនីតិសម្បទា អ្នកញៀនគ្រឿងញៀន នៃកងពលតូចថ្មើរជើង លេខ៣១ បានបង្កើតឡើង នៅថ្ងៃទី២៧ ខែធ្នូ ឆ្នាំ២០១៥ ដែលមានផ្ទៃដី ៦៧.០០០ម៉ែត្រការ៉េ ស្ថិតនៅភូមិត្រពាំង ឈើទាល ឃុំច្រេស ស្រុកជុំគិរី ខេត្តកំពត៕
