លោកឧកញ៉ា ខេមរៈ សិរីមន្ត កំពូលតារាចម្រៀងផលិតកម្ម ហ្គាឡាក់ស៊ី ណាវ៉ាត្រា បានចូលរួមបរិច្ចាគថវិកាចំនួន ៥លានរៀលក្នុង១ឆ្នាំ រយៈពេល៥ឆ្នាំដល់សមាគមសិល្បករខ្មែរ។
សមាគមសិល្បករខ្មែរ បានបង្ហាញឱ្យដឹងលើទំព័រហ្វេសប៊ុកផ្លូវការរបស់សមាគម នៅល្ងាចថ្ងៃទី៣០ ខែឧសភា ឆ្នាំ២០២៤នេះថា ក្នុងជំនួបជាមួយលោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ និងថ្នាក់ដឹកនាំសមាគមនារសៀលនេះ លោកឧកញ៉ា ខេមរៈ សិរីមន្ត បានចូលរួមបរិច្ចាគថវិកាចំនួន ៥លានរៀលក្នុង១ឆ្នាំ រយៈពេល៥ឆ្នាំដល់សមាគម។
ការចូលបរិច្ចាគនេះ គឺដើម្បីចូលរួមចំណែកជួយសម្រាលទុកលំបាករបស់សិល្បករចាស់ជរា។ ក្រៅអំពីការចូលរួមច្រៀង និងសម្ដែងដោយស្ម័គ្រចិត្តសម្រាប់ព្រឹត្តិការណ៍ “អ្នកស្នងមរតក” នៅថ្ងៃទី៣១ ខែឧសភា ស្អែកនេះ លោកឧកញ៉ាអះអាងថា នឹងចូលរួមបន្តទៀត ប្រសិនបើសមាគមមានតម្រូវការណាមួយឱ្យលោកឧកញ៉ាជួយ។ សមាគមសិល្បករខ្មែរ បានថ្លែងអំណរគុណយ៉ាងជ្រាលជ្រៅចំពោះលោកឧកញ៉ា ខេមរៈ សិរីមន្ត នូវការលះបង់ចូលរួមចំណែកក្នុងសកម្មភាពរបស់សមាគម។
សូមជម្រាបថា សមាគមសិល្បករខ្មែរ នឹងរៀបចំកម្មវិធី “អ្នកស្នងមរតក” នៅរសៀលថ្ងៃទី៣១ ខែឧសភា ឆ្នាំ២០២៤ ស្អែកនេះ ដែលមានការអញ្ជើញចូលរួមពីសំណាក់ព្រឹទ្ធាចារ្យសិល្បៈ សិល្បករចាស់ជរា និងសិល្បករទូទៅប្រមាណ២០០០នាក់ ក្រោមអធិបតីភាពដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត៕
