អ្នកឧកញ៉ា វិញ ហួរ ប្រធានក្រុមប្រឹក្សាភិបាលក្រុមហ៊ុន កំពតផត (Kampot Port Co., Ltd) ជាអ្នកជំនួញពហុវិស័យដ៏លេចធ្លោរមួយរូបនៅកម្ពុជា ដែលកំពុងកាន់កាប់ក្រុមហ៊ុនធំៗជាច្រើននៅក្នុងដៃ ខណៈដែលកាលដើមខែមិថុនា ឆ្នាំ២០២៤នេះ អ្នកឧកញ៉ា ទើបសម្ពោធដាក់ឱ្យប្រើប្រាស់កំពង់ផែពហុបំណងកំពត តម្លៃ១៤០លានដុល្លារ នៅខេត្តកំពត។
អ្នកឧកញ៉ា ជាម្ចាស់ក្រុមហ៊ុនផ្គត់ផ្គង់អគ្គិសនី កំពត អេឡិកទ្រីស៊ីធី សឹបផ្លាយ (Kampot Electricity Supply Co., Ltd) ដែលបានបើកដំណើរការ តាំងពីខែមិថុនា ឆ្នាំ២០១២។ អ្នកឧកញ៉ា ក៏ជាសហស្ថាបនិក រោងចក្រផលិតស៊ីម៉ង់ត៍ បាត់ដំបង ខនស៍ ស៊ីមេន លីមីធីត (Battambang Conch Cement Company Limited) ដែលវិនិយោគអស់ទឹកប្រាក់ ២៣០លានដុល្លារ នៅតំបន់ភ្នំដូនមាយ ឃុំស្តៅ ស្រុករតនៈមណ្ឌល ខេត្តបាត់ដំបង និងត្រូវបានបង្កើតឡើងដោយក្រុមហ៊ុនធំៗពីរចូលហ៊ុនគ្នា ជាមួយនឹងអ្នកឧកញ៉ា ស៊ី គង់ទ្រីវ។
អ្នកឧកញ៉ា វិញ ហួរ ជាម្ចាស់គម្រោងអភិវឌ្ឍន៍កំពង់ផែពហុបំណងកំពត មានទីតាំងស្ថិតនៅភូមិគីឡូ១២ សង្កាត់កោះតូច និងសង្កាត់បឹងទូក ក្រុងបូកគោ ខេត្តកំពត ដែលត្រូវបានរាជរដ្ឋាភិបាលអនុញ្ញាតឱ្យបង្កើតឡើងអំឡុងឆ្នាំ២០០៥ និងត្រូវបានក្រសួងសាធារណការ និងដឹកជញ្ជូនអនុញ្ញាតឱ្យអភិវឌ្ឍសាងសង់ហេដ្ឋារចនាសម្ព័ន្ធកំពង់ផែនៅអំឡុងឆ្នាំ២០១២ លើផ្ទៃដីគោកទំហំសរុប ២០៧ហិកតា ដែលជាកម្មសិទ្ធិរបស់ក្រុមហ៊ុនកំពតផត និងផ្ទៃទឹក ៦៧៨ហិកតា ជាកម្មសិទ្ធិរបស់រដ្ឋ ដែលរាជរដ្ឋាភិបាលបានសម្បទានអនុញ្ញាតឱ្យក្រុមហ៊ុនកំពតផត គ្រប់គ្រង ថែទាំ និងប្រើប្រាស់ សម្រាប់ធ្វើជាប្រឡាយនាវាចរណ៍ កន្លែងនាវាចេញ-ចូល ឬផ្ទេរផ្ទុកទំនិញនៅកំពង់ផែ។
តាមប្រភពជិតស្និទមួយដែល ឧកញ៉ា ញូស៍ ទទួលបាន នៅខែកញ្ញា ឆ្នាំ២០២៤ ខាងមុខនេះ ក្រុមហ៊ុនកំពតផត របស់អ្នកឧកញ៉ា វិញ ហួរ ក៏គ្រោងនឹងសម្ពោធដាក់ឱ្យដំណើរការរោងចក្រដែក នៅក្នុងតំបន់សេដ្ឋកិច្ចពិសេសកំពត ដែលរោងចក្រនេះ អាចផលិតដែកបានក្នុងបរិមាណ ៤៥ម៉ឺនតោនក្នុងមួយឆ្នាំ ដើម្បីនាំចេញទៅកាន់ប្រទេសកាណាដា។
ជាមួយគ្នានេះ នៅខែវិច្ឆិកា ឆ្នាំ២០២៤ ក្រុមហ៊ុនក៏គ្រោងសម្ពោធដាក់ឱ្យដំណើរការរោងចក្រស៊ីម៉ង់ត៍ នៅខេត្តកំពង់ស្ពឺ ដែលអាចផលិតស៊ីម៉ង់ត៍ក្នុងបរិមាណ ២លានតោនក្នុងមួយឆ្នាំ។ លើសពីនេះ នៅខែមីនា ឆ្នាំ២០២៥ ខាងមុខ ក្រុមហ៊ុនក៏គ្រោងនឹងសម្ពោធដាក់ឱ្យដំណើរការរោងចក្រអគ្គិសនី ដែលមានកម្លាំង ២៦៥មេហ្គាវ៉ាត់ នៅខេត្តឧត្តរមានជ័យ។
សូមជម្រាបថា លោកឧកញ៉ា វិញ ហួរ អនុប្រធានសភាពាណិជ្ជកម្មកម្ពុជា និងជាសមាជិកក្រុមប្រឹក្សាភិបាលនៃសមាគមឧកញ៉ាកម្ពុជា ត្រូវបានព្រះមហាក្សត្រចេញព្រះរាជក្រឹត្យត្រាស់បង្គាប់ផ្តល់គោរមងារ «អ្នកឧកញ៉ា» កាលពីថ្ងៃទី២៥ ខែឧសភា ឆ្នាំ២០២៣៕
