លោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាល ក្រុមហ៊ុន ជីប ម៉ុង, អនុប្រធានសមាគមឧកញ៉ាកម្ពុជា និងអ្នកឧកញ៉ា វិញ ហួរ ប្រធានក្រុមប្រឹក្សាភិបាលក្រុមហ៊ុន កំពតផត, សមាជិកក្រុមប្រឹក្សាភិបាលសមាគមឧកញ៉ាកម្ពុជា បានស្ម័គ្រចិត្តជួយសាងសង់ផ្ទះជូនអតីតយុទ្ធជនក្រីក្រ និងអតីតយុទ្ធជនមានពិការភាព ម្នាក់ក្នុងមួយឆ្នាំចំនួន ១០០ខ្នង។ នេះបើតាមការបង្ហើបឱ្យដឹងពី លោកកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា នៅព្រឹកថ្ងៃទី២៦ ខែមិថុនា ឆ្នាំ២០២៤នេះ។
ថ្លែងក្នុងសុន្ទរកថាក្នុងពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា ២១មិថុនា ឆ្នាំ២០២៤ នៅសាកលវិទ្យាល័យការពារជាតិ ស្ថិតក្នុងខណ្ឌឫស្សីកែវ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជា និងជាអនុប្រធានទី១ សមាគមអតីតយុទ្ធជនកម្ពុជា លោកកិត្តិសង្គហបណ្ឌិត គន់ គីម បានមានប្រសាសន៍ដូច្នេះថា៖ “អម្បាញ់នេះ លោកអ្នកឧកញ៉ា លាង ឃុន តំណាងក្រុមហ៊ុន ជីប ម៉ុង លោកថាជួយសាងសង់ផ្ទះមួយឆ្នាំ១០០ខ្នង ហើយអ្នកឧកញ៉ា វិញ ហួរ ធ្លាប់ជួយសម្តេចតេជោ ៥ឆ្នាំ បាន៥០០ខ្នង ហើយសម្រាប់សម្តេចធិបតី ក៏អ្នកឧកញ៉ាបន្តជួយ ៥ឆ្នាំ ចំនួន ៥០០ខ្នងផងដែរ”។
លោកកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានបញ្ជាក់ទៀតថា មុនកិច្ចពិធីនេះលោកបានធ្វើការអំពាវនាវដល់ថ្នាក់ដឹកនាំបណ្តាក្រសួង ស្ថាប័ន និងសប្បុរសជននានា ឱ្យជួយសាងសង់ផ្ទះបន្ថែម ដោយសារឆ្នាំ២០២៤នេះ មានការខ្វះខាតខ្លាំង រហូតដល់ទៅ ២០០០ខ្នងឯណោះ។
គោលបំណងនៃការប្រារព្វពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា គឺដើម្បីរំឭកដល់គំរូវីរភាពដ៏មោះមុត និងគុណបំណាច់ដ៏ធំធេងរបស់អតីតយុទ្ធជន ដែលបានធ្វើពលិកម្មយ៉ាងអង់អាចក្លាហាន បូជាសាច់ស្រស់ ឈាមស្រស់ ក្នុងការរំដោះប្រទេសជាតិរួចផុតពីរបបប្រល័យពូជ សាសន៍ ប៉ុល ពត។ ការប្រារព្ធទិវានេះ បង្ហាញឱ្យឃើញអំពីគុណូបការៈរបស់អតីតយុទ្ធជនក្នុងការលះបង់ ប្ដេជ្ញា និងមានឆន្ទៈមោះមុតក្នុងការស្នេហាជាតិមាតុភូមិ ការពារបូរណភាពទឹកដី កសាងសន្តិភាព និងស្ថិរភាពសង្គមសំដៅដល់ការធានា ឱ្យមានការអភិវឌ្ឍសេដ្ឋកិច្ច និងសង្គម ដើម្បីជាឧត្តមប្រយោជន៍ជូនជាតិមាតុភូមិ និងប្រជាជនកម្ពុជា។
សូមជម្រាបថា សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្ដេចកិត្តិព្រឹទ្ធបណ្ឌិត, សម្ដេចធិបតី ហ៊ុន ម៉ាណែត នាយករដ្ឋមន្ដ្រីម្ពុជា និងលោកជំទាវបណ្ឌិត រួមជាមួយក្រសួងស្ថាប័ន និងសប្បុរសជននានា បានសាងសង់ផ្ទះជូនអតីតយុទ្ធជន និងគ្រួសារពលី គិតត្រឹមឆ្នាំ២០២៤នេះ បានចំនួនសរុប ៥,៥៦៩ខ្នង រួមទាំងការផ្តល់ដីសម្រាប់បង្ករបង្កើនផល សាលារៀន មន្ទីរពេទ្យ វត្តអារ៉ាម ហេដ្ឋារចនាសម្ព័ន្ធផ្លូវថ្នល់ និងការរៀបចំជាភូមិជូនអតីតយុទ្ធជនក្រីក្រ ដែលស្ម័គ្រចិត្តទៅរស់នៅលើដីសម្បទានសង្គមកិច្ច៕
