ឧកញ៉ា ហុង ឆេងឈុន ប្រធានសមាគមសហគ្រិនកម្ពុជាសាមគ្គីដើម្បីអភិវឌ្ឍន៍ រួមទាំង ឧកញ៉ាៗ ដែលសុទ្ធតែជា ម្ចាស់ក្រុមហ៊ុន ម្ចាស់អាជីវកម្ម និងសហគ្រាសធំៗ នៅកម្ពុជា ប្រមាណជាង ២០នាក់ រួមទាំងមន្ត្រីក្រសួងស្ថាប័នពាក់ព័ន្ធជាច្រើននាក់ បានរួមដំណើរជាមួយគ្នា ចុះបំពេញបេសកកម្មពិសេសរយៈពេល ៥ថ្ងៃ ចាប់ពីថ្ងៃទី២៩ ខែមិថុនា ដល់ថ្ងៃទី០២ ខែកក្កដា នៅប្រទេសជប៉ុន ដើម្បីចូលរួមពង្រីកបណ្ដាញអ្នកវិនិយោគ ពីប្រទេសជប៉ុន មកកម្ពុជា។
បេសកកម្មធុរកិច្ចរយៈពេល ៥ថ្ងៃ ទៅកាន់ប្រទេសជប៉ុន រៀបចំ និងដឹកនាំដោយ សមាគមសហគ្រិនកម្ពុជាសាមគ្គីដើម្បីអភិវឌ្ឍន៍ ឧកញ៉ា ហុង ឆេងឈុន រួមមាន៖ ឯកឧត្តម កង សុវណ្ណារ៉ូ អភិបាលរងខេត្តកំពង់ស្ពឺ, ឯកឧត្តម ឡោ ទិត្យចាន់សុភក្ត័ ទីប្រឹក្សាក្រុមអភិវឌ្ឍន៍កម្ពុជា, ឧកញ៉ា សួ សុខថេង នាយកប្រតិបត្តិ The Parkway, ឧកញ៉ា លន លាងហុង នាយកប្រតិបត្តិLorn City Group, លោក អុឹង សុីវឈន់ នាយកប្រតិបត្តិ ទឹកបរិសុទ្ធ Provida, ឧកញ៉ា ហួន លីមីង និងអគ្គនាយកក្រុមហ៊ុន ប្រមាណ ២០ ក្រុមហ៊ុន ក្រោមការទទួលស្វាគមន៍យ៉ាងកក់ក្ដៅបំផុតពី ឯកឧត្តម ទុយ រី ឯកអគ្គរាជទូតនៃព្រះរាជាណាចក្រកម្ពុជា ប្រចាំប្រទេសជប៉ុន ។
បេសកកម្មថ្ងៃដំបូង ឧកញ៉ា ហុង ឆេងឈុន ក៏បានដឹកនាំប្រតិភូសមាគម បានចូលទស្សនកិច្ចការងារ ក្នុងរោងចក្រ Biomass Power Generation ដែលជារោងចក្រផលិតថាមពល អគ្គីសនីពីបន្ទះឈើដ៏ធំក្នុងខេត្តអ៉ីបារ៉ាគី (Ibaraki) ប្រទេសជប៉ុន និង Solar Power Generation ជាកសិដ្ឋានសូឡា ដែលផលិតថាមពលអគ្គិសនីពីពន្លឺព្រះអាទិត្យ សម្រាប់ផ្គត់ផ្គង់នៅក្នុងតំបន់។
បន្ទាប់ពីនោះ ប្រតិភូ កូបានចូលជួបសំណេះសំណាល និងពិភាក្សាការងារ ជាមួយឯកឧត្តម Takahiro Yamaguchi ចៅហ្វាយក្រុង Atsugi ដើម្បីសិក្សាលើការទាក់ទាញវិនិយោគ និងផ្តល់ទំនុកចិត្តក្នុងការសហការគ្នារវាង ធុរៈជននៅទីក្រុងAtsugi និងសមាគមសហគ្រិនកម្ពុជាសាមគ្គីដើម្បីអភិវឌ្ឍន៍ទៅថ្ងៃមុខ។
នៅថ្ងៃទី០១ ខែកក្កដា ឆ្នាំ២០២៤ នោះដែរ ក្រុមការងារបានរៀបចំពិធីចុះអនុស្សរណៈយោគយល់គ្នា រវាងសមាគមសហគ្រិនកម្ពុជាសាមគ្គីដើម្បីអភិវឌ្ឍន៍ និងក្រុមហ៊ុន Kojima Holdings Group ដឹកនាំដោយលោក Kojima Masanobu ប្រធានក្រុមហ៊ុន Kojima និងជាប្រធានសមាគមវិនិយោគក្នុងខេត្ត កាណាហ្គាវ៉ាក់ ប្រទេសជប៉ុន នៅសណ្ឋាគារ Atsugi Urban Hotel ទីក្រុងអាតស៊ូហ្គិ ។
គោលបំណងនៃការចុះ MoU គឺដើម្បីរឹតចំណងមិត្តភាពឱ្យកាន់តែជិតស្និទ្ធ និងរួមសហការគ្នាក្នុងការជំរុញសកម្មភាពសេដ្ឋកិច្ច ពាណិជ្ជកម្ម ឧស្សាហកម្ម ទេសចរណ៍ និងការវិនិយោគ តាមរយៈវិស័យឯកជនរវាងកម្ពុជានិងជប៉ុន ឱ្យកាន់តែមានការរីកចម្រើនប្រសើរឡើងថែមទៀត។
ដឹកនាំប្រតិភូសមាគម ចូលជួបជាមួយ ក្រុមហ៊ុន Soramitsu Co.,Ltd ដែលជាក្រុមហ៊ុនឌីហ្សាញទៅលើ Blockchain ពាក់ព័ន្ធនឹងសុវត្ថិភាពក្នុងការផ្ទេរប្រាក់សម្រាប់ប្រព័ន្ធធានាគារ និងក្រុមហ៊ុន Vivit Co.,Ltd ជាក្រុមហ៊ុនដែលអភិវឌ្ឍទៅលើកម្មវិធី សម្រាប់វាស់វែងសណ្ឋានដីគ្រប់ប្រភេទ ដោយប្រើប្រាស់ដ្រូនក្នុងការវាស់ និងគណនាពីសណ្ឋានដី។
នាថ្ងៃបេសកកម្មចុងក្រោយក្នុងដំណើរទស្សនៈកិច្ចស្វែករកឱកាសវិនិយោគនោះដែរ ឧកញ៉ា ហុង ឆេងឈុន និងប្រតិភូសមាគម ក៏បានជួបទស្សនកិច្ចការងារ ជាមួយក្រុមហ៊ុន សាងសង់លំដាប់កំពូល ដ៏ល្បីល្បាញប្រចាំ ទីក្រុង អាតស៊ូហ្គិ ខេត្តកាណាហ្គាវ៉ា ប្រទេសជប៉ុន ដែលមានអាយុកាលរហូតដល់ ១៣០ឆ្នាំ មកហើយ។
បេសកកម្មទាក់ទាញអ្នកវិនិយោគិនជប៉ុន រយៈពេល ៥ថ្ងៃ នោះ ឧកញ៉ា ហុង ឆេងឈុន ប្រធានសមាគមសហគ្រិនកម្ពុជាសាមគ្គីដើម្បីអភិវឌ្ឍន៍ ក៏បានវាយតម្លៃខ្ពស់ ហើយដាក់ក្ដីរំពឹងយ៉ាងមុតមាំថា ឆាប់ៗនេះ ទាំងលោកឧកញ៉ាផ្ទាល់ និងលោកឧកញ៉ាៗ អគ្គនាយកក្រុមហ៊ុនធំៗ ដែលបំពេញបេសកកម្មទៅទាក់ម៉ូយអ្នកវិនិយោគិនជប៉ុន នឹងមានលទ្ធផលជាផ្លែផ្កា ជាមួយអ្នកវិនិយោគជប៉ុន មកកម្ពុជាជាក់ជាមិនខាន៕
