លោក ឡយ ភាល័យ ស្ថាបនិក និងជាម្ចាស់ទំព័របណ្តាញសង្គម (Facebook, Tik Tok) ឈ្មោះ Camcar Collection កាលពីយប់ថ្ងៃទី១០ ខែកក្កដា បានសំណូមពរមហាជនអ្នកលេងបណ្តាញសង្គម និងអ្នកគាំទ្រទាំងអស់ សូមកុំបញ្ចេញមតិប៉ះពាល់ដល់គោរមវ័ន្តឧកញ៉ា ដោយលោកបញ្ជាក់ថារឿងនេះ ជារឿងបុគ្គលនោះទេ។
អ្នកជំនាញវិស័យយានយន្តរូបនេះ បានបង្ហោះសារលើទំព័រហ្វេសប៊ុក Camcar Collection កាលពីយប់មិញ យ៉ាងដូច្នេះថា៖ “ខ្ញុំចង់តែបញ្ចប់បញ្ហាទេ។ ខ្ញុំសុំចិត្តបងប្អូន បើពិតជាស្រឡាញ់ខ្ញុំ កុំយកខ្ញុំដើម្បីគេងចំណេញនយោបាយ។ បើក្រុមជ្រុលនិយម ចង់ទាញរឿងចូលនយោបាយ ខ្ញុំ block ចោល ជាពិសេសមិនពាក់ព័ន្ធជាមួយលោកអ្នកឧកញ៉ាផ្សេងឡើយ ហើយក៏មិនពាក់ព័ន្ធស្ថាប័នណាឡើយ”។
លោកបានបន្ថែមថា រឿងនេះគឺជារឿងរបស់លោកជាមួយអ្នកឧកញ៉ា លី សុភ័ក្ត តែប៉ុណ្ណោះ។ បើលោកខុស លោកព្រមទទួលទោស ពោលខុសគឺខុស ត្រូវគឺត្រូវ ហើយលោកក៏មិនល្អគ្រប់ ១០នោះដែរ។ ទោះយ៉ាងណា បើលោកត្រូវជាប់គុក ចាត់ទុកថាជាកំហុសរបស់លោកទៅចុះ។
គួររំឭកថា កាលពីថ្ងៃទី០៩ ខែកក្កដា លើបណ្ដាញសង្គមផ្ទុះការវែកញែកយ៉ាងក្ដៅគគុក ក្រោយម្ចាស់ផេក Camcar Collection បានបង្ហោះសារជាសារធាណៈ ដើម្បីពន្យល់ពីអង្គហេតុពាក់ព័ន្ធ ករណីម្ចាស់រថយន្ត ដែលបានទិញរថយន្ត យកមកទទួលសេវាកម្មកែច្នៃនៅការ៉ាស់របស់ខ្លួន។ សាររបស់ម្ចាស់ផេក Camcar បានធ្វើឱ្យមហាជនមួយចំនួន បានបញ្ចេញមតិក្នុងបណ្តាញសង្គមមិនគប្បីធ្វើឱ្យប៉ះពាល់ដល់កិត្តិយស និងសេចក្ដីថ្លៃថ្នូររបស់គោរមវ័ន្តឧកញ៉ា ជាទូទៅផងដែរ៕
